Алтынньы 31 күнүгэр улуустааҕы үөрэтэр-оҥорон таһаарар кииҥҥэ илиилэригэр талааннаах оскуола оҕолоругар аналлаах күрэх буолан ааста.
Оҕолор мастан, муостан, ювелирнай оҥоһуктар, төрүт иис, куукуланы оҥоруу, скульптурнай уонна кумааҕыттан моделирование курдук хас да хайысханан арахсан күрэхтэстилэр.
Майатааҕы оҕо ускуустубатын оскуолатын уруһуйга салаатын учууталлара эксперт быһыытынан ыҥырыллыбыттара: Александр Необутов мастан оҥоһуктары уонна Аксинья Жиркова муостан оҥоһуктары дьүүллээтилэр. Күрэх кыттыылаахтарын үлэлэригэр оҕо ураты көрүүтэ, саҥаны айыы, сонун оҥоһугу оҥоруу уонна үлэ хаачыстыбата сыаналаннылар.
Бу күрэххэ Майатааҕы оҕо ускуустубатын оскуолатын уруһуйга салаатын 3-с кылааһын үөрэнээччитэ Алина Бурнашева кыттыыны ылла (салайааччы Аксинья Жиркова). Кини “Скульптурнай моделирование” хайысхаҕа 14-тэн 18-гар диэри саастаах оҕолор ортолоругар 3-с истиэпэннээх лауреат буолла.
Манна куонкурус кыттыылаахтара 4 чаас устата үлэлээн, И.Сосин «Ойуурга моҕотой угуйар», «Сахсаахаан Сахаар кэпсээннэрэ» диэн кинигэлэр персонажтарын, дьоруойдарын скульптурнай пластилинтан оҥорон таһаардылар.
Прасковья Назарова,
М.К.Попова аатынан Майатааҕы оҕо ускуустубатын оскуолатын тэрийээччи-бибилэтиэкэрэ.
