Павловскай орто оскуолатыгар быйылгы үөрэх дьылыттан 7-11 кылаас үөрэнээччилэригэр “Россия ‒ мои горизонты” профориентационнай хайысхалаах уруоктар ыытыллаллар. Бу маннык идэҕэ туһаайыы уруоктар улахан кылаас үөрэнээччилэригэр олус наадалаахтар. Оҕолор араас элбэх идэни билэллэр, инникитин идэлэрин талалларыгар судургу буолар.
Алтынньы 20 күнүгэр 7 а кылаас үөрэнээччилэрэ Аллараа Бэстээхтээҕи «Сахатранснефтегазсбыт» тэрилтэҕэ идэҕэ туһаайар сыаллаах-соруктаах экскурсияҕа сылдьан кэллилэр. Тэрилтэ үлэһиттэрэ оҕолору бэрт эйэҕэстик көрсөн, оҕолорго үлэ — хамнас хаамыытын туһунан олус интэриэһинэйдик кэпсээтилэр. Ол курдук, экскурсия саҕаланыытыгар тэрилтэҕэ сэрэхтээх буолуу исписэлииһэ Владимир Николаевич Колесов быраабылалары билиһиннэрдэ, интруктажка илии баттатта, инспектор Александра Юрьевна Точенова тус сыаллаах үөрэх туһунан, ханнык специальностаах үлэһиттэр наадаларын туһунан кэпсээтэ, баҕа санаатын тириэртэ. Тэрилтэ кылаабынай инженерэ Алексей Алексеевич Константинов экскурсовод буолан тэрилтэ устуоруйатын, үлэтин-хамнаһын, хайысхатын туһунан олус умсугутуулаахтык кэпсээн оҕолор интэриэстэрин тарта.
Оҕолор экскурсияҕа сылдьан олус астынан, сорохтор бу тэрилтэҕэ үлэлиэм этэ диэн баҕа санаалаах тарҕастылар.
С.П.Иванова,
В.Н. Оконешников аатынан Павловскай орто оскуолатын учуутала.
