Бүгүн, олунньу 21 күнүгэр, М.К.Аммосов аатынан Хотугулуу-Илиҥҥи федеральнай университет Майа сэлиэнньэтин «Кыталык» уопсастыбаннай киинигэр «ХИФУ күнэ» диэн ааттаах үрдүкү кылаас оҕолоругар идэҕэ туһаайар тэрээһинин ыытта.
Үөрэх дьаарбаҥкатыгар ХИФУ факультеттарын, институттарын бэрэстэбиитэллэрэ оҕолорго үрдүк үөрэх кыһатын, ханнык идэлэргэ үөрэтэрин туһунан сиһилии билсиһиннэрэ, кэпсии кэлбиттэр. Тэрээһиҥҥэ 12 оскуолаттан 10-11 кылаас үөрэнээччилэрэ, уопсайа 130 оҕо, кыттыыны ыллылар.
Улуус баһылыгын социальнай уонна имиджевэй бэлиитикэҕэ солбуйааччы Альбина Григорьева тэрээһин үөрүүлээх аһыллыытыгар оҕолорго туһаайан:
— Эһиги биһиги инники эрэллэрбит буолаҕыт. Ханнык идэни талан ыларгытыттан дьылҕаҕыт быһаарыллар. Бүгүн эһиэхэ олус эппиэтинэстээх уонна туһалаах күн буоллун, — диэн ийэлии алҕаата.
Салгыы улуустааҕы үөрэх управлениетын начаалынньыгын солбуйааччы Ирина Плотникова үөрэнээччилэргэ ыҥырыыны ылынан кэлбиттэригэр махтанна, үөрэх кыһатын бэрэстэбиитэллэригэр туох ыйытыы баарын барытын биэрэн, сурунан баралларыгар сүбэлээтэ. Тутар киин хамыһыйа сүрүн исписэлииһэ Петр Кычкин үөрэххэ туттарсан киирэргэ туох ирдэнэрин, биир кэлим эксээмэн баалларын, төһө миэстэ баарын сиһилии сырдатта.
Оҕолор бүгүҥҥү тэрээһинтэн үгүһү билэн-көрөн тарҕаспыттара буолуо диэн эрэнэбит.
Елизавета Неустроева.
