Мэҥэ Хаҥалас улууһугар аар-саарга аатырбыт В.К.Степанов аатынан «Култуура уонна успуорт эстэпиэтэтэ» бэстибээл 68-с алгыстаах айана олунньу 15 күнүгэр саҕаланна. Бастакы бөлөххө эстэпиэтэ былааҕа Ытык Тараҕай сиригэр күөрэйдэ.
Хотун Төҥүлү култуураны, успуорду өрө туппут дьоно-сэргэтэ кэлэн, успуорт үгэс буолбут 10 көрүҥэр илин-кэлин түһүстүлэр, тыҥааһыннаах киирсиилэр буолан аастылар. Түмүккэ успуорт хайысхатыгар төҥүлүлэр 22,5 очукуону сурунан, кыайыы өрөгөйун биллилэр. Табаҕа очукуота 12,5 тэҥнэстэ. Күрэхтэһии судьуйатынан улуустааҕы успуорт управлениетын начаалынньыгын солбуйааччы Иннокентий Баишев үлэлээтэ.
Култуура хайысхатын көрүҥнэрин улуустааҕы култуура, духуобунас управлениетын салайааччы Анна Исакова салайааччылаах дьүүллүүр сүбэ сыаналаата. Дьүүллүүр сүбэ састаабыгар быйыл Майатааҕы оҕо ускуустубатын оскуолатын дириэктэрэ, СӨ култууратын үтүөлээх үлэһитэ Василий Захаров, Саха сирин Дархан оһуохайдьыта, култуура мэтэдьииһэ Станислав Иванов, «Кыталык» оҕо-ыччат сайдар киинин үлэһитэ Туяра Стручкова, норуот маастара Лина Маркова үлэлээтилэр.
Тараҕай нэһилиэгин чуор куоластаахтара, хомоҕой хоһоонноохторо 66 киһилээх оһуокай түһүлгэтин, Мэҥэлии оһуокай уратытын утумнаабыт кэскиллээх этээччи Мирослав ПОРЯДИН, Бүлүү бөлөх оһуокайынан эдэрдии эрчимнээх этээччи Айаал ДМИТРИЕВ, ону тэҥэ алгыстаах түөлбэ ырыатын-тойугун Павел СЛЕПЦОВ төрүттээтилэр. Көрүү түмүгүнэн устар ууну сомоҕолуур уран тыллаах култуура уонна успуорт эстэпиэтэтин арыйбыт Уол Табаҕа оһуокайдьыттара ДИПЛОМАНТ үрдүк аатын ыллылар. Тараҕай нэһилиэгин оһуокайын түһүлгэтэ 3,94 баалынан сыаналанна.
Уус-уран оҥоһук быыстапкатыгар 49 кыттааччы 212 үлэни туруорда. Нэһилиэк талааннаах уран уустара, маастардара түмсүүлээхтик үлэлииллэрэ биһирэннэ. Евгения Тарасовна Егорова салайааччылаах уруһуй хартыыналарынан дьарыктанар түмсүү кыттыылаахтара Айталина Сосина, Вероника Бурнашева дипломант аатын ыллылар. «Утум» түмсүү хаһыс да сылын иис-күүс үлэтигэр айымньылаахтык ылсан үлэлэһэр, салайааччы – норуот маастара Марианна Викторовна Маркова. Түмсүүгэ үлэлэһэр уран тарбахтаахтар кылтан, сиэлтэн, туостан, туойтан, аттаран тигии үлэлэрэ дипломант, лауреат үрдүк ааттарын ыллылар. Улахан ааттаах-суоллаах идэтийбит маастардар В.А.Красноперов, В.С.Левин, А.Г.Марков, Ю.Н.Иванов үлэлэрэ быыстапканы киэргэттилэр. Тимир ууһа Сергей Оконешников киһи сөҕө көрөр маастарыстыбалаах, үрдүк таһымнаах 19 үлэлэрин быыстапкаҕа туруоран, лауреат аатын ылыан ылла. Табаҕа талба талааннаахтарын быыстапката оруобуна 4 баалынан сыаналанна.
Төҥүлу талааннаах дьонун сэргэх кэнсиэрин олохтоохтор сылаас ытыстарын тыаһынан доҕуһуоллаан, астына-дуоһуйа көрдүлэр. «Кылыҥкай» үҥкүү бөлөҕун толоруутугар «Дьиэрэҥкэй», эр дьон триотун толоруутугар «Ийэм таптаабыт хатыҥа» ырыа, Дмитрий Васильев толоруутугар «Кыайыы туһунан ырыа», «Ситим» үҥкүү бөлөҕун толоруутугар «Синий платочек» үҥкүү, «Саллаат суолунан» уус-уран ааҕыы, «Айыллаана» вокальнай ансаамбыл толоруутугар «Доброта» ырыа уонна ыччаттар туруорбут түмүктүүр нүөмэрдэрэ үрдүктүк сыаналанан, лауреат буоллулар. Кэнсиэр дипломааннарынан хор толоруутугар «Тыыннаахтар умнубат сыллара», «Кылыс» фольклор бөлөҕун толоруутугар чабырҕах, Сайыына Гаврильева ырыата, «Алгыс» ансаамбыл толоруутугар «Эр хоһуун» үҥкүү уонна «Тиэхэлээх тэбэнэттэр» «Кийиит» диэн көрдөөх сыаҥкалара ааттаннылар. Кэнсиэргэ барыта 102 киһи кытынна. Төҥүлүлэр кэнсиэрдэрэ 4,11 баалынан сыаналанна.
68-с төгүлүн ыытыллар култуура уонна успуорт эстэпиэтэтэ быйыл даҕаны улууспут талааннаахтарын үтүө түһүлгэтэ буолан, дьон-сэргэ сүргэтин көтөҕөн, нэһилиэктэр икки ардыларыгар доҕордуу сыһыаны олохтоон, чаҕылхай талаан, успуорт ситиһиитин бырааһынньыга буолан, үрдүк таһымҥа ааһыаҕа диэн эрэнэбит.
Нэһилиэктэрбитигэр ситиһиини баҕарабыт. Ким түмсүүлээх, үчүгэй бэлэмнээх – ол кыайдын!
