Хотун Төҥүлү Эбэтин уутунан сууммут уһун суһуохтаах кэрэ кыргыттар ыһыах күн суһуох уһунунан күрэс былдьастылар

Уһун суһуох, хойуу хара баттах былыр былыргыттан ытыктанара. Уһун суһуох алдьархайтан абыраабытын, быыһаабытын туһунан үһүйээннэргэ, олоҥхоҕо да үгүстүк кэпсэнэр. Оттон уһун суһуохха умсугуйан, кинини хоһуйан үгүс ырыа-тойук, хоһоон айылыннаҕа.

Арассыыйаҕа Дьиэ кэргэн, өрөспүүбүлүкэҕэ Оҕо саас, улууска Тыа хаһаайыстыбата, Төҥүлү нэһилиэгэр Дьиэ кэргэн сылыгар аналлаах “Төрүт түөлбэм Төҥүлүм!” үрүҥ тунах ыһыаҕар “Толбоннурар уһун суһуох” талыы талба кэрэ куо кыргыттарга аналлаах куонкурус ыытылынна.

Долгуннура-толбоннура оонньуур уһун суһуохтаах 22 кыыс ыһыах биир ураты күрэһэр кыттынна. Кыттааччылары түөрт сүһүөххэ арааран кыайыылаахтары Мирослав Заровняев сутуругун тутумунан быһаардылар: 4-7 саастаахтарга бастакы миэстэни Амелия Баишева, иккиһи Амелия Атласова, үсүһү Софья Сазонова ыллылар.

8-10 саастаахтарга бастакы миэстэ 11 тутум 3 тарбах суһуохтаах Виктория Гаврильева, иккис оруобуна 10 тутум суһуохтаах Сахая Ноговицина, үһүс 9 тутум үс тарбах  суһуохтаах  Вика Стручкова буоллулар.

11-14 саастаах кыргыттарга бастакы миэстэни 13 тутум суһуохтаах Сайнара Барашкова,  иккиһи 11 тутум 3 тарбах суһуохтаах  Вика Баишева, үсүһү 10 тутум 2 тарбах  суһуохтаах Валерия Федотова ылары ситистилэр.

15-18 диэри саастаах улахан кыргыттарга 12 тутум 2 тарбах суһуохтаах Юлия Дьяконова уонна Вераника Кардашевская тэҥнэстилэр.

Хотун Төҥүлү Эбэтин уутунан сууммут кыргыттар баттахтара уһунун, кыраларыттан кыыс оҕо сүрүн киэргэлэ кини суһуоҕа буоларын өйдүүллэрин, харыстыылларын биһирии, сэргии көрдүм.

Елизавета Неустроева.