Бырабыыталыстыба дьиэтигэр үөрүүлээх быһыыга-майгыга бу сылга ыксаллаах быһыыга-майгыга хорсун быһыыны оҥорбут дьоруой оҕолорго наҕараадалары туттардылар.
«Хорсун быһыыны көрдөрбүтүн иһин» мэтээлинэн, РФ Федерациятын Сэбиэтин бэрэссэдээтэлэ Валентина Матвиенко илии баттааһыннаах дастабырыанньаны туппут оҕолор ортолоругар Майа уолаттара Николай Жирков уонна Роберто Ноев бааллар.
Кинилэр бу сайын бэс ыйыгар Майа сэлиэнньэтигэр 2 этээстээх элбэх кыбартыыралаах мас дьиэҕэ баһаар турбутун түбэһэ көрөннөр, уолуйбакка, көмөлөһө сүүрбүттэр. Уолаттар баһаарынайдар кэлиэхтэригэр диэри иккис этээскэ олорор табаарыстарын эбэтин быыһаабыттар, уокка былдьанан эрэр ыаллар малларын таһаарарга көмөлөспүттэр.
Николай Жирков билигин Харбалаахтааҕы үөрэхтээһин холбоһугун баһаарынайдары бэлэмниир бөлөҕүн бастакы кууруһун устудьуона. Роберто Ноев В.П.Ларионов аатынан Майа орто оскуолатын 9 «а» кылааһын үөрэнээччитэ.
Маннык ыксаллаах быһыыга-майгыга толлон турбат, сөптөөх быһаарыныы ылынар хорсун санаалаах уолаттар барыбытыгар холобур буолаллар. Кинилэринэн киэн туттабыт уонна үтүө ыччаттары иитэн таһаарбыт төрөппүттэригэр махтанабыт.
