Бүгүн, олунньу 12 күнүгэр, Саха Өрөспүүбүлүкэтин бырабыыталыстыбатын 2024 с. үлэтин отчуота Мэҥэ Хаҥалас улууһун Хорообут нэһилиэгэр буолла.
Отчуот мунньаҕын нэһилиэк баһылыга Гаврил Бродников бэрэссэдээтэллээн ыытта. СӨ судаарыстыбаннай былааһын толорор уорганнарын 2024 с. үлэтин-хамнаһын Николай Бочков слайданан 2022-2024 сс. сыыппаралары тэҥҥэ тутан хайысхаларынан сырдатта. Бу кэннэ олохтоохтор тута ыйытыыларга, тыл этиитигэр киирдилэр.
Хорообуттар биир дойдулаахтара, киинэ артыыһа, култуура киинин исписэлииһэ Ньургун Бэчигэн: “Бүгүҥҥү күҥҥэ нэһилиэгим сайдыытыгар кылааппын киллэрбит киһи диэн баҕалаах кэлэн турабын. Тыа сиригэр ыччат хаалбата тыын боппуруоспут буолла. Бу боппуруоһу мунньах аайы илдьиритиһэбит даҕаны биир түмүккэ кыайан кэлбэппит. Бу биир биричиинэтинэн биһиги оҕо сайдыытын, үөрэҕи, дьарыгы эккирэтэн куоракка киирэбит. Ол улаханнык болҕомтоҕо ылыллыбат быһыылаах. Тустаах хайысхаҕа үөрэх эйгэтин исписэлиистэрэ кэлэн сыл аҥаара эрэ үлэлээт, төттөрү барарга күһэллэллэр. Земскэй учуутал диэнинэн уонна култуура үлэһитигэр диэн быйылгы сылтан саҥа киирэн эрэр. Манна саҕалыырга нэһилиэккэ туох эрэ көстөрө буоллар. Тыа хаһаайыстыбатыгар үлэлиэн баҕалаах киһи сирэ-уота суох буолан хаалар, барыта үллэһиллэн турар. Ол чааһыгар сирдээх киһиттэн эттэһэн оттуурга аҥар аҥарга диэн буолар эбэтэр этинэн төлөһөҕүн. Онон бу боппуруостарга эппиэт ылаары кэллим”, ‒ диэтэ. Инникитин бу салааҕа ылсар былааннаах эдэр киһи оҕону үлэнэн иитэргэ сайыҥҥы лааҕырдары үлэлэтэргэ, манна куонкуруска кыттарга туох ирдэнэрин ыйытта.
Педагогическай үлэ бэтэрээнэ Павел Скрябин көмүс хостуур хампаанньалартан төһө нолуок киирэрий, эбии үөрэхтээһин учууталларыгар эбии төлөбүр тоҕо тохтоото, оҕону патриотическай иитиигэ туох үлэ барар, биллиилээх дьоммут тоҕо Европаҕа талаһар, ааспыт сылга туруорсубут 8 боппуруостарыттан төһөтө кыаллыбытын-кыаллыбатаҕын сырдатыы суоҕун, гаастааһыҥҥа өрөспүүбүлүкэ көмөтүгэр эрэнэрин, анал байыаннай дьайыы дьоруойдарынан үгүстэрэ тыа сирин дьоно буолалларын киэн тутта эттэ итиэннэ бырабыыталыстыба үлэлиир диэтэ.
Эдэр учууталларга хамнас эбиллэр дуо, үүт харчытын сыаната хаһан биллиэй, гаас хаһан киирэрий, оҕуруот аһын олордорго уонна туттарарга кииннэммит сир тутуллара буоллар, водопровод хаһан тардыллар, анал байыаннай дьайыы хаһан бүтэр, Ил Дархан тоҕо сахалар баралларын бопсубат, тыа сирин нэһилиэктэригэр ханан даҕаны доруобуйа харыстабылын уонна оскуолаларга учууталлар тиийбэттэригэр туох үлэ барар, өрүһү туоруур суудуналар сыаналарыгар, о.д.а. ыйытыылар киирдилэр.
Муниципальнай сулууспа бэтэрээнэ Валерий Колосов отчуокка сыыппаралар ситэтэ суохтарын, земскэй учууталынан, земскэй бырааһынан муҥурдаммакка исписэлиистэри анаан тарҕатарга, биэнсийэлээх Федора Попова сүөһү иитэр, 70-тан үөһэ саастаах дьоҥҥо көмө харчы көрүллэригэр, бэтэрээн сэбиэтин бэрэссэдээтэлэ Татьяна Тролукова сүөһү ахсааныгар бэриллэр көмө харчыны үүт харчытын кытта тэҥҥэ көрүөххэ, медсиэстэрэ Римма Москвитина быраас наадатын, ветлечебница сэбиэдиссэйэ Илья Сергучев бэтэринээр тиийбэтин, хамнас үрдүөн наадатын, о.д.а. туруорсан эттилэр. Туһааннаах салайааччылартан нэһилиэнньэ астынар эппиэттэрин ылла. Туруорсар боппуруостарын боротокуоллаан бөлөх салайааччытыгар Николай Владимировичка туттардылар.
Олохтоохтор бырабыыталыстыба сыллата кэлэн атах тэпсэн олорон үлэни-хамнаһы отчуоттууругар махтаннылар, үлэни биһирииллэрин эттилэр.
Марелла Баишева.
