Олунньу 19 күнүгэр эстафета былааҕын күөрэччи тутан, Хорообут нэһилиэгин олохтоохторо Мэҥэ нэһилиэгэр ыалдьыттаатылар. Хорообуттары, дьүүллүүр сүбэни Мэҥэ нэһилиэгин ыалдьытымсах дьоно алаадьынан айах тутан көрүстүлэр.
Бэстибээл үгэс курдук оһуокайтан саҕаланна. Балыктаах түһүлгэтигэр барыта 88 киһи оһуокайы оройуттан туттулар. Эдэр кэскиллээх оһуокай таһаарааччылар Санаайа Максимова уонна Мария Кычкина, ону тэҥэ Петр Дохунаев бүгүҥҥү күн Мэҥэлии оһуокай түһүлгэтин төрүттээтилэр. Балыктаахтар оһуокайдара 4,0 баалынан сыаналанна. Оһуокайы таһаарааччылар Петр Дохунаев дипломант, Санаайа Максимова уонна Мария Кычкина лауреат үрдүк аатын ылан, нэһилиэктэрин ааттаттылар.
Мэҥэ нэһилиэгин уран уустара, талааннаах маастардара эстэпиэтэ тиэмэтин арыйар уус-уран оҥоһук быыстапкатыгар 450 тахса үлэни туруордулар. Нэһилиэк түөлбэлэрэ, түмсүүлэрэ үбүлүөйдээх сылларга анаан аттаран, кыбытан тигиилээх, туостан паннолара, туойтан оҥоһуктара, куукулалара, уус-уран хартыыналара биһирэннилэр. СӨ уус-уран оҥоһугун маастара Валентина Борисовна Березкина кылтан, сиэлтэн араас көрүҥ оҥоһуга, суҥ сөрүөтэ, норуот маастардара Ньургун Иннокентьевич Гоголев алтан тимиртэн дьахтар уонна эр киһи киэргэллэрэ, Василий Иннокентьевич Гоголев – Уйулҕан мастан уус-уран оҥоһуктара, Антонина Николаевна Мордискина дьахтар уонна эр киһи толору кыһыҥҥы таҥастара, Павел Васильевич Габышев, Роман Иннокентьевич Гоголев үрдүк маастарыстыбаны көрдөрдүлэр. Сардана Романовна Бочкарева эдэр ураты үлэлэрдээх маастар Дьоруой мэтириэтин синньэлээбитэ улахан болҕомтобутун ылла. Түмүккэ быыстапка 4,15 баалынан сыаналанна.
Успуорка доҕордуу көрсүһүүгэ тыҥааһыннаах киирсии түмүгэр, ахсаан 20.5 – 14.5 тэҥнэстэ. Бу сырыыга ыалдьыттар ордук бэлэмнээхтэрин көрдөрөн, Хорообут спортсменнара кыайыы үөрүүтүн биллилэр.
Хорообут нэһилиэгин кэнсиэригэр Балыктаах дьоно-сэргэтэ тоҕуоруһа муһунна. Хуор толоруутугар ирдэбилгэ турбут 2 ырыа: “Мэҥэ өрөгөйүн ырыата” уонна “Тыыннаахтар умнубат сыллара” ырыа дипломант буоллулар. «Эрэл» үҥкүү бөлөҕун толоруутугар эр дьон «Күүлэй», ини-бии Сергучевтар толорууларыгар «Ийэбэр» ырыа, эр дьон ансаамбылын толоруутугар «Манчаары Баһылай», уус-уран ааҕыы бөлөҕүн толоруутугар «Саҥата суох саллаат», «Дайаана» чабырҕахсыттар бөлөхтөрө, фольклор көрүҥнэрин композицията, Алексей Пинигин клоунадата уонна ыччат түмүктүүр нүөмэрдэрэ биһирэнэн, дипломант аатын сүктүлэр. Бастыҥ нүөмэрдэринэн «Эрэл» үҥкүү бөлөҕун толоруутугар «Синий платочек», «Дьиэрэҥкэй» үҥкүүлэр, Линда Захарова, Федор Сергучев ырыалара ааттанан, лауреат буоллулар. Кэнсиэргэ барыта 65 киһи кытынна. Хорообуттар кэнсиэрдэрэ 4,02 баалынан сыаналанна.
Култуура уонна успуорт эстэпиэтэтэ Мэҥэ нэһилиэгэр үгэс курдук улахан сэргэхсийиини киллэрэн, култуура, оскуола дьиэлэринэн ыытыллыбыт тэрээһиннэргэ дьон сүргэтэ көтөҕүллэн туран сырыттылар. Аны олунньу 21 күнүгэр Эстэпиэтэ былааҕын Балыктаахтар Аллараа Бэстээххэ илдьэ айанныахтара. Улууспут киинигэр успуорт, култуура үтүө түһүлгэлэрэ төрүттэниэхтэрэ. Нэһилиэктэрбитигэр ситиһиини баҕарабыт. Ким түмсүүлээх, үчүгэй бэлэмнээх – ол кыайдын!
