Мэҥэ Хаҥаласка үөрэхтээһин 150 сылын чэрчитинэн, Хорообут орто оскуолатыгар үөрэх хаачыстыбатын үрдэтэр сыалтан үөрэхтэригэр туйгуннук уонна үчүгэйдик үөрэнэр оҕолорго баал ыытылынна.
Дириэктэр Владислав Иванов көҕүлээтэ. Баал ыалдьыттарынан төрөппүттэрбит, нэһилиэкпит тэрилтэлэрин салайааччылара, бэтэрээн учууталларбыт буоллулар. Үөрэнээччилэр биир-биир барааттаан киирэн истэхтэрин аайы кылаас салайааччылара 17 туйгун, 46 үчүгэй үөрэнээччилэргэ анал бэлиэлэри кэтэрдэн истилэр. Владислав Петрович эҕэрдэлээн, үөрэх туйгуннарыгар грамоталары, тэрилтэлэрбит успуонсардаабыт бэлэхтэрин туттартаата.
2 кылаас үөрэнээччилэрэ куруук «5» сыанаҕа үөрэниэхпит диэн андаҕар тылларын эттилэр.
Үҥкүүһүт оҕолорбутунан киэн туттабыт (салайааччы Нюрбина Брызгалова). Киэҥ саалаҕа кэрэ сибэккилэр курдук вальстаан тэлээрдилэр.
Сыл бастыҥнарын ааттара олохтонно. «Алын сүһүөх бастыҥ үөрэнээччилэрэ» ааты 4 кылаастан Лилиана Курилкина, Одун Плотников, «Орто сүһүөх бастыҥ үөрэнээччилэрэ» 7 кылаастан Лилиана Шестакова, 8 кылаастан Юра Жирков, «Үрдүкү сүһүөх бастыҥ үөрэнээччилэрэ» 11 кылаастан Милена Владимирова, 10 кылаастан Тастыгин Миша ааттаннылар. Төрөппүт сүбэтэ олохтообут анал бэлиэтэ, Эҕэрдэ сурук туттарылынна.
2024 сыл түмүгүнэн уон бастыҥ үөрэнээччи анал бэлиэнэн наҕараадаланнылар. Олимпиадаларга миэстэлэспит бастыҥ үөрэнээччилэргэ Юра Жирковка, Лилиана Шестаковаҕа, Милена Владимироваҕа, Марианна Андрееваҕа, Петя Андреевка оскуола салалтатын грамоталара, учууталлар сыллата туттарар истипиэндьийэлэрэ ананна. Бэтэрээн учууталларбыт бастыҥ үөрэнээччигэ анал истипиэндьийэни Лилиана Курилкинаҕа туттардылар.
Бырааһынньык ырыалаах-тойуктаах буолла, үлэһиттэр минньигэс туордунан күндүлээтилэр.
Октябрина Васильева, Хорообут орто оскуолата
