Балаҕан ыйын 22 күнүгэр Хорообукка “Алаас ас” тыа хаһаайыстыбатын оҥорон таһаарар кэпэрэтиибигэр саҥа сыах дьиэтин аһыллыыта буолан ааста.
Ытыктыыр салайааччыбыт, Саха Өрөспүүбүлүкэтин тыа хаһаайыстыбатын үтүөлээх үлэһитэ, туйгуна Прокопий Романович Плотников көҕүлээн 2016 с. сыаҕы тутуу саҕаламмыта. Кини сырдык аатын үйэтитэр өйдөбүнньүк билиитэни дьиэ кэргэнэ уонна Хорообут нэһилиэгин баһылыга Гаврил Бродников арыйдылар.
Үөрүүлээх тэрээһиҥҥэ СӨ тыа хаһаайыстыбатын министиэристибэтин солбуйааччыта Артем Александров, оройуон баһылыга Дмитрий Тихонов, Хорообут нэһилиэгин баһылыга Гаврил Бродников, «Алаас ас» кэпэрэтиип салайааччыта Светоний Шестаков кыттыыны ылан эҕэрдэлээтилэр, кыһыл лиэнтэни быстылар.
Сыах салайааччыта Светоний Геннадиевич үлэ-хамнас хайдах барбытын, саҥа оборудование хайдах үлэлиирин билиһиннэрдэ. «Алаас ас» кэпэрэтиип оҥорон таһаарбыт арыыта 2022 с. өрөспүүбүлүкэтээҕи ас-үөл быыстапка-дьаарбаҥкатыгар маҥнайгы миэстэни ылан, нэһилиэкпит аатын ааттаппыта.
Бу күн хаһаайыстыба үлэһиттэрэ бэлиэ наҕараадалары туттулар. Өр сылларга бэриниилээхтик үлэлээбит лаборант Дария Борисова “СӨ тыа хаһаайыстыбатын туйгуна”, оробуочай Галина Ильина СӨ Тыа хаһаайыстыбатын министиэристибэтин Бочуотунай грамотатын, Махтал суруктары Наталья Плотникова, Светоний Шестаков, Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлин Бочуотунай грамотатын суоппар Павел Семенов, бэтэрээн үлэһит Александра Петрова, оройуон баһылыгын Махтал суругун технолог Юлия Егорова, тэрилтэ бэтэрээнэ Николай Шарин тутар чиэстэннилэр. Тэрилтэ салайааччылара тыл этэн сэмэй бэлэхтэри туттардылар. Салайааччы Светоний Геннадиевич саҥа сыах үлэҕэ киирэригэр көмөлөспүт тутаах үлэһиттэргэ махтанна.
Үүт аһы оҥорон таһаарар сыах бары үлэһиттэригэр туруоруммут сыалларын ситиһэн, өр кэмҥэ үрдүк таһаарыылаахтык үлэлииллэригэр баҕарабыт.
Наталья Плотникова.
