Хорообукка Олоҥхо күнүгэр аналлаах тэрээһиннэр сэргэхтик ыытылыннылар.
Нэһилиэк баһылыга Гаврил Бродников дэкээдэни аста, быйылгы былааны билиһиннэрдэ. Олохтоох бибилэтиэкэ үлэһитэ Варвара Филиппова, нэһилиэк устуоруйатыгар кимнээх олонхоҕо сыһыаннаах дьон баарын, «Эркээйи» хаһыакка бэчээттэммит матырыйаалга олоҕуран иһитиннэриини оҥордо. Салгыы тэрилтэ салайааччылара олоҥхоттон быһа тардыылары аахтылар, сиэр-туом ыытылынна, саламаатынан, алаадьынан күндүлээтилэр.
Күн иккис аҥаарыгар оскуола үөрэнээччилэригэр, олохтоохторго норуот айымньытын дьиэтигэр тэрээһин ыытылынна. «Олоҥхо ‒ мин дойдум» кинигэ быыстапка туруорулунна, «Дьурулуйар Ньургун Боотур» олоҥхоттон кэрчиктэринэн аахтылар, оҕолорго олоҥхо туһунан сахалыы ойуулук көрдөрүлүннэ. Мэҥэ Хаҥалас олоҥхоһуттарын туһунан оскуола педагог-бибилэтиэкэрэ Елена Птицына кэпсээтэ, «Өркөн өй» күрэһин саха тылын учуутала Айталина Александровна ыытта. «Киистэ кэпсээннээх олоҥхо» оҕолор уруһуйдарын куонкуруһа буолла. Тэрээһин оһуокайынан түмүктэннэ.
