Тохсунньу 26 күнүгэр Хорообут нэһилиэгэр улуус баһылыга Дмитрий Тихонов 2023 сыллаах үлэтин отчуоттаата.
Оройуон Сэбиэтин бэрэссэдээтэлэ Иннокентий Андросов уонна управлениелар, тэрилтэлэр салайааччылара кытыннылар. Мунньаҕы нэһилиэк баһылыга Гаврил Бродников иилээн-саҕалаан ыытта.
Нэһилиэк 79 олохтооҕо толору истэн, ааспыт сыллааҕы үлэни-хамнаһы үрдүктүк сыаналаатылар уонна бэйэлэрин санааларын эттилэр, ыйытыылары биэрдилэр. Сүрүннээн нэһилиэккэ гаас ситимэ киириитин, ОДьКХ төлөбүрүн хонтуруолун, суол оҥоһуутун, эмп атыылыыр пуун, нэһилиэктэр икки ардыларыгар автобус сырыыта олохтоноро наадатын эттилэр. Үөрэнээччи оскуолаҕа аһылыгын төлөбүрэ, бэйдиэ сылдьар ыттар, арыгы утары охсуһуу боппуруостара таарылынна. Нэһилиэк электроуотун күүрүүтэ үрдүгүттэн араас кыһалҕа баарын, элбэх оҕолоох дьиэ кэргэҥҥэ бэриллэр учаастак уочаратын, үүт харчыта хойутаан кэлэрин, саҥа үлэһиттэргэ олохсуйан олорор дьиэлэрэ суоҕун, култуура уонна успуорт эстэпиэтэ хаамыытын ыйыттылар уонна санааларын үллэһиннилэр.
Иван Лукин.
