Хорообукка «Мин дойдум ‒ мин Мэҥэм» диэн төрөөбүт-үөскээбит, үлэлии-хамсыы сылдьар дойдубут Мэҥэ Хаҥалас 95 төрүттэммит сылыгар уонна Ийэ тылбытыгар ананан, коммерческай оонньуу ыытылынна.
Эҕэрдэ тылынан нэһилиэк баһылыгын солбуйааччы Тамара Семенова арыйда. Тэрилтэ үлэһиттэртэн 3 хамаанда биэстии киһилээх кытынна.
Нэһилиэк олохтоох бибилэтиэкэрэ Варвара Филиппова бастакы түһүмэххэ улууспутугар анаммыт тургутугу ыытта. Салгыы оскуола бибилэтиэкэрэ Елена Птицына «Кини кимий?» диэни аайтарда. Үһүс түһүмэҕи Ньургун Бэчигэн «Ийэ тылбытыгар» анаата, тургутугу таһымнарынан арааран таайдарда. Саҥа тахсыбыт «Алаас» оонньууну тутуннубут.
Дьүүллүүр сүбэҕэ Тамара Семенова, Октябрина Васильева үлэлэстилэр. Түмүккэ «Эрэл» хамаанда бастаата. Иккис «Мохсоҕол», үһүс миэстэ «Сомоҕо» хамаандалар буоллулар.
Варвара Филиппова. Хорообут
