Сэтинньи 25 күнүгэр Саха сиригэр национальнай бырааһынньык – Олоҥхо күнэ. Бу күн 2005 с. сэтинньи 25 күнүгэр ЮНЕСКО саха эпоһын киһи-аймах материальнайа суох шедеврин быһыытынан билиммитэ. Олоҥхо — Саха норуотун былыргы эпоһын ускуустубата, саха фольклорун тиһигэр киин миэстэни ылар. Бырааһынньык үөрүүлээх тэрээһиннэрэ сэтинньи 25 күнүттэн ахсынньы 5 күнүгэр диэри ыытыллаллар.
Холгума нэһилиэгигэр Олоҥхо дэкээдэтэ бэрт сэргэхтик буолан ааста. Сэтинньи 25 күнүттэн саҕалаан, олохтоох бибилэтиэкэ үлэһитэ үгэс буолбут олоҥхо дьыктаанын суруйтарда. Нэдиэлэ устата дьыктаан иккитэ суруллубута. Кыттыыны ылбыт дьон Туоһу сурук, грамота туппуттара.
“Сардаана” уһуйаан иитиллээччилэригэр «Олоҥхо оҕо хараҕынан” тэрээһин ыытылынна. Кырачаан истээччилэргэ анаан- минээн хартыынаннан олоҥхону кэпсээн иһитиннэрдилэр, уруһуйдаттылар.
«Олоҥхо ‒ норуот тылынан уус- уран чыпчаала» кинигэ быыстапка тэрилиннэ.
Ахсынньы 6 күнүгэр дэкээдэни «Олоҥхо дойдутун устун айан» тэрээһин түмүктээтэ. Бу күн оскуола оҕолоро, учууталлар, нэһилиэк дьон мустаннар олоҥхоттон быһа тардыылары иһиттилэр, викторинаҕа оонньоотулар, хомустаатылар, КВЕСТ оонньуу оонньоотулар уонна бүтэһигэр оһуокайдаатылар. Бу күн «Олоҥхо оҕо хараҕынан» оҕолор уруһуйдаабыт уруһуйдарынан, оҥоһуктарынан быыстапка туруорулунна. Кыайыылаахтар грамоталарынан, бириистэринэн наҕараадаланан үөрэн-көтөн тарҕастылар. Маны таһынан нэдиэлэ устата оскуолаҕа туһунан арааһынай олоҥхоҕо аналлаах тэрээһиннэр оҥоһуллубуттара.
Татьяна Попова, олохтоох бибилэтиэкэ үлэһитэ.
