Саас халлаан эрдэ сырдаан, салгын сылыйан, күн уһаан туох барыта уһуктар, тыллар кэмэ. Майаҕа сандал саас 1-кы күнүгэр И.М.Сосин аатынан киин бибилэтиэкэҕэ Мэҥэ Хаҥалас улууһун “Таммахтар” литературнай холбоһук биир көхтөөх ааптара, улуустааҕы киин балыыһа колл-киинин үлэһитэ Майя Ильина хоһоон сезонун арыйда.
Майя Ильина туһунан кылгастык сырдаттахха, ыам ыйыгар төрөөбүт, ураты буочардаах, нууччалыы, сахалыы тылларынан суруйар ааптар буолар. Бастакытын хоһоонун түһүлгэтэ 2019 с. тэриллэн ыытыллыбыта. Майаҕа оскуолаҕа киириэҕиттэн нуучча кылааһыгар үөрэммит буолан сахалыы дириҥник хорутан билбэппин, аны нуучча буолбатах буоламмын иэйиибин ситэ тириэрдибэт буолуохпун сөп диэн сэмэйдик этинэр. Кини бэйэтин иэйиилэрин хааччахтаабакка айар-тутар көҥүл тыыннаах ааптар диэххэ сөп.
Бу күн ааптар сахалыы, нууччалыы суруйбут 10-тан тахса хоһооннорун аахта. Бастакы “Тугуй бу” хоһооно “Эркээйи” хаһыакка быйыл улууспут төрүттэммит күнүгэр анаммыт “Үүнэ-сайда тур, төрөөбүт дойдубут” балаһаҕа бэчээттэнэн тахсыбыта. Манна ааптар хайа да кэмҥэ уларыйбат чахчылары бэлиэтии көрбүтүн соһуйан суруйбут. Биир туохтан да уратыта суох алтынньы киэһэтигэр утары иһэр планшеттаах оҕону көрөн, оҕо сылдьан бибилэтиэкэттэн уларсыбыт кинигэтин ааҕа-ааҕа дьиэтигэр кэлэрин, ол ахтылҕан алыптаах куйаарыгар куустаран сүрэҕин кылын таарыйтарбытын этэр. Дьиэҕэ олорор кэмигэр күн-дьыл хаамыытын кэтээн көрдөҕүнэ чаас аайы уларыйа турарын бэлиэтиир. Онно сөп түбэһиннэрэн араас иэйии киирэн кэлэр диир. Таптал туһунан “Красивый мальчик”, Амма өрүскэ, Короленко хайатыгар сылдьыбытын, бэрэски туһунан, курсуйбут килиэп оҕо сааһы санатарын хоһуйбут хоһооннорун аахта. Эҕэлээх, кириитикэлиир да хоһооннор бааллар. Олортон “Хараххар харчы кыбыллыа” диэн хоһоонун ааҕан иһитиннэрдэ. Манна иҥсэлээх-оботтоох дьону сиэрдээхтик сылдьарга ыҥырыы курдук иһиттим.
Маны сэргэ, “Уруукалары кытта кэпсэттим”, “В моих слезах”, “Пуночки”, “Время создано”, “Мин күнтэн тоҕо саһыамый”, “Потекли ручьи”, “Май” диэн хоһооннорун айыллыбыт устуоруйаларыттан сырдатан туран аахта.
Саас чалбах, бадараан хайаан да баар буолар. Бу олох көстүүтэ бэйэтэ туспа оҕо-аймаҕы тардар күүстээҕин бэлиэтээн, оҕо сааһын умнуллубат түгэннэрин ахтан кэлэн сырдык мичээринэн сыдьаайда. Саас, таптал туһунан хоһооннорунан 2 хомуурунньук бэлэмнээбит.
Майя Павловна түмүгэр поэзия киэһэлэрэ үгүстүк тэриллиэхтэрин, хас айар-суруйар киһи бэйэтин айар дьоҕурун хаһан баҕарар, ханна баҕарар аһаҕас микрофоҥҥа тахсан этиэн-тыыныан баҕарарын эттэ.
Оскуоланы бүтэртэрбит учуутала Раиса Владимировна Петрова сибэкки дьөрбөтүн ыытан соһуччу үөрүүнү бэлэхтээтэ. Майя Павлова учууталыгар Раиса Владимировнаҕа итиэннэ хоһоонун түһүлгэтин ыытарыгар көмөлөспүт бибилэтиэкэ эппиэттээх үлэһиттэригэр, чуолаан Алтаана Зыковаҕа махталын тиэрдэр.
“Таммахтар” литературнай холбоһук чилиэннэрэ, 10 кинигэлээх суруйааччы Инна Николаева – Угинка, элбэх хоһооно ырыа буолан көппүт, “Догдоҥо дорҕоонноро” хоһоонньуттар түмсүүлэрин салайааччы Светлана Иванова-Намыына, Ходоро нэһилиэгин бибилэтиэкэрэ, кэпсээннэри суруйар Мария Левина эҕэрдэлээн туран сибэкки дьөрбөтүн туттардылар.
Майяны ийэтэ Валентина Николаевна курдук үчүгэйдик билэр, өйдүүр киһи суоҕа буолуо. Бу да күн ийэтэ кыыһын хас биирдии хоһоонун сырдык мичээрдээх олорон иһиттэ, хас биирдии хоһоон суруллубут устуоруйатын кэпсээтэҕинэ сөбүлэһэрин биллэрэн, үөрэн кэҕиҥнии олордо. Педагогическай үлэ, успуорт бэтэрээнэ Ульяна Шишигина, үлэ, култуура бэтэрээнэ Зоя Шарина санааларын үллэһиннилэр. Кинилэр Майя киһи быһыытынан олус чычаас дууһалааҕын, аһыныгас, үтүө, элэккэй майгылааҕын, суруйар истиилэ уратытын бэлиэтээн эттилэр итиэннэ айар үлэтинэн инникитин киэҥ эйгэҕэ тахса турарыгар баҕаларын тиэртилэр. Манна эбэн эттэххэ, Майя Ильина “Эркээйи” хаһыаты сыллата бэйэтэ сурутан ааҕарын таһынан, бэйэтин баҕатынан элбэх оҕолоох ыалга көмөлөһөр сыаллаах бэһис сылын успуонсардаан кэллэ. Бу кини үтүө-кэрэ майгытын өссө төгүл туоһулуур. Түгэнинэн туһанан, эрэдээксийэ аатыттан улахан махталбын тиэрдэбин.
Мустубут дьон лирика ис хоһоонноох тэрээһинтэн астынан, махтанан тарҕастылар.
Марелла Баишева.
