Ходоролор буурҕа-буулдьа дьылын өйдөбүнньүгүн сөргүттүлэр

Гражданскай сэрии кэмэ дойдубут устуоруйатыгар буурҕа-буулдьа дьылынан ааттанар.

Анатолий Пепеляев баандата Саха сирин, Дьокуускай куораты сэриилээн ылаары Амманан кимэн киирбитэ, куораты кытта сибээһи быспыта. Ол иһин куораттан Феодосий Сыроватскай хамандыырдаах этэрээти Аммаҕа разведкаҕа ыыталлар. Куораттан 65 килэмиэтирдээх сиргэ, билигин Чүүйэ сиригэр, тоһуурга түбэһэллэр, улахан аҥаардара онно охтор, аҕыйах киһи бааһыран, нэһиилэ куотан, кыл тыыннара хаалан, куораты булаллар.

Феодосий Митрофанович Сыроватскай 1894 с. төрөөбүт, омугунан нуучча. Оскуолаҕа үөрэммэтэр да бэйэтэ ааҕар, суруйар буолбут, идэтинэн сибээс үлэһитэ эбит, социальнай балаһыанньата – пролетариат, кэргэннээх, 2 оҕолоох. Рабочайдар ортолоругар бырабыыталыстыбаны утары ис хоһоонноох куруһуогу тэрийбитин иһин хаайылла сылдьыбыт. Кыһыл Аармыйа кэккэтигэр 1920 с. олунньу ыйга киирбит. Саха сиригэр актыыбынай революционнай үлэтин иһин идэлээх сойууска чилиэнинэн ылбыттар, взвод хамандыырынан анаммыт.

Тоһуурга түбэспит сирдэригэр 1960 с. оройуон комсомолецтара өйдөбүнньүк бэлиэ туруорбуттар.

70-80-с сс. оройуоҥҥа хомсомуол алын сүһүөх тэрилтэлэрин ортотугар “Революционнай, бойобуой уонна үлэ албан аатын миэстэлэринэн” диэн улахан күрэхтэһиилэр тэриллэллэрэ. Ол тэрээһин чэрчитинэн 1985 с. хомсомуол райкомун тэрийэр үлэҕэ салаатын сэбиэдиссэйэ Афанасий Мигалкин, олох-дьаһах кэмбинээтин бастыҥ комсомолецтара Андрей Решетников, Василий Шарин көҕүлээннэр, комсомолецтар бу пааматынньыгы көннөрөн, кырааскалаан, күрүөлээн оҥорбуттар.

2018 с. Чүүйэ олохтооҕо, ытык кырдьаҕаспыт Василий Тихонович Гаврильев бэйэтэ мас аҕалан, ыччаттары кытта күрүөлээн, саҥардан биэрбиттэрэ.

Бу күннэргэ Ходоро нэһилиэгин дьаһалтатын, култуура дьиэтин үлэһиттэрэ, олохтоох ыччаттар, бэтэрээннэр пааматынньык олоҕун саҥардан, күрүөтүн абырахтаан, кырааскалаан биэрдилэр. Бэйэбит кыргыттарбыт, Ходоро нэһилиэгин Бочуоттаах олохтоохторо: Саха Өрөспүүбүлүкэтин култууратын үтүөлээх үлэһитэ Саргылана Саввична Адамова, Дьокуускай куоракка Чүүйэттэн төрүттээхтэр түмсүүлэрин салайааччыта Татьяна Андреевна Семенова көҕүлээһининэн пааматынньык сөргүтүлүннэ, тоһуурга түбэһэн олохторун толук уурбут комсомолецтар, хомуньуустар ааттара толору суруллубут саҥа дуоска ыйанна.

Үөрүүлээх тэрээһин кыттыылаахтарын нэһилиэк баһылыга Виктор Федоров, биир дойдулаахтарбыт Саргылана Адамова, Татьяна Семенова, Р.Г.Васильев аатынан улуустааҕы кыраайы үөрэтэр түмэл билим үлэһитэ Александр Эверстов эҕэрдэлээтилэр. Үтүө дьыаланы көҕүлээбит кыргыттарбытыгар дьаһалта Махтал суругун, сибэкки дьөрбөтүн туттардылар.

Буурҕа-буулдьа дьылыгар олохторун толук уурбут байыастарга аналлаах өйдөбүнньүгү сөхсүтүү биһиги, чүүйэлэр, ытык иэспит буолар, ыччаттарбытыгар үтүө холобур буолан үйэлэргэ хаалыа диэн сыалтан оҥоһулунна. Айан дьоно манна тохтоон, сүгүрүйэн ааһар сирдэрэ буолуо диэн эрэнэбит.

 

Евдокия Исакова,

Чүүйэ.