Ходороҕо социальнай эбийиэктэри тутуу, өрөмүөннээһин – тирээн турар соруктар

Бырабыыталыстыба үһүс бөлөҕө күн иккис аҥарыгар Ходоро нэһилиэгэр үлэлээтэ.

Чүүйэҕэ кэлээт кинилэр саахалланар туруктааҕынан сабыллан турар култуура киинин көрдүлэр.

В.В.Скрябин аатынан Чүүйэ орто оскуолатыгар буолбут нэһилиэнньэ иннигэр отчуокка дакылааты бөлөх салайааччыта Саха Өрөспүүбүлүкэтин гражданскай оборонаҕа, нэһилиэнньэ олоҕор-дьаһаҕар куттал суох буолуутун хааччыйыыга миниистири солбуйааччы Никита Павлов оҥордо.

Нэһилиэк олохтоохторун оскуола өрөмүөнэ хаһан ыытыллара, култуура дьиэтин, успуорт саалатын тутуу, бөһүөлэк иһинэн ааһар «Амма» өрөспүүбүлүкэ суолун аспааллааһын, сырдатыы, киин хочуолунайтан дьиэлэргэ уу ситимин тардыы, хаарбах дьиэттэн көһөрүү бырагырааманан дьиэни тутуу, ынах төбөтүгэр көрүллэр көмөнү отчуоттааһын бэрээдэгэ, о.д.а. тирээн турар кыһалҕалар долгуталларын ыйыталастылар.

Отчуоттуур бөлөх салайааччыта Никита Павлов, улуус баһылыгын бастакы солбуйааччы Василий Михайлов нэһилиэккэ саамай наадалаах эбийиэктэри туруорсаргыт хайаан да боротокуолга киирэн, быһаарыллалларыгар салгыы бииргэ үлэлиэхпитин наада диэн бэлиэтээн эттилэр.

Олохтоох хочуолунай күүһүн туһанан дьиэлэргэ уу ситимин киллэрии боппуруоһун Мария Тимофеева туруоруста. Быйыл 50 сылын туолар оҕо уһуйаана 10 сыллааҕыта өрөмүөннэммитэ эрээри муостатынан тымныытын, сылытыы үлэтигэр көмөнү көрдөөн сэбиэдиссэй Раиса Атласова эттэ.

Нэһилиэк баһылыга Виктор Федоров үөһэ этиллибит култуура киинин, успуорт саалатын тутууну, оскуоланы өрөмүөннээһини тэҥэ оҕо уһуйаанын тутууну эмиэ туруорсабыт диэтэ. Хатыҥнаахха ситэ тардылла илик уот ситимигэр сип-хаабылы тардыы, Ф.Г.Охлопков аатынан саҥа кыбаарталга күөх төлөн ситимин тардыы соруктара туралларын эттэ. Чүүйэнэн ааһар улахан суолга саахал, сүөһүнү үнтү көтүү түбэлтэлэрэ тахсарынан, манна массыына түргэнник айанныырын хааччахтыыр суол үрдэтиилэрэ итиэннэ хонтуруоллуур хаамыралар туруоруллалларын ирдэһиэхтэрэ. Майа – Чүүйэ суолу сырдатыыны уонна суол кытыытынан сатыы сылдьар дьоҥҥо тротуары оҥорууну туруорсаллар.

«Чүүйэ» муниципальнай тэрилтэ үлэһитэ Владимир Расторгуев сир тиийбэтинэн ыраах сиргэ оттообут хаһаайыстыбаларга оту таһыыга көмө эрэйиллэрин эттэ. Саха сүөһүтүн иитэр тирэх хаһаайыстыба салайааччыта Аркадий Дмитриев үбүлээһин олус хойутаан кэлэрэ тиэхиньикэҕэ саппаас чаас ыларга харгыстары үөскэтэрин бэлиэтээтэ.

Нэһилиэк бары тыын боппуруостарыгар ылыннарыылаах быһаарыылары биэрбит отчуоттуур бөлөххө махтанан оскуола дириэктэрэ Милан Илларионов эттэ. Кини нэһилиэк дьокутаата буоларынан, кэнники кэмҥэ поселениелар сайдыыларын көрөн бэйэлэрэ тыыралларыгар үп көрүллүбэт буолла, кыра нэһилиэккэ урукку курдук маннык үбүлээһин кэлин баар буолара буоллар диэн баҕа санаатын үллэһиннэ. Улууска өрөспүүбүлүкэ таһымнаах улахан күрэхтэһиилэр буолбатахтара ыраатта. Ону туруорсан, аныгыскы Манчаары оонньуутун Мэҥэ Хаҥаласка ыытар кыах биэрэллэрэ буоллар, эбийиэктэр тутуллан сайдыы барыа этэ, сорох күрэхтэһиилэри Чүүйэҕэ ыытарга былааннаан, успуорт эбийиэгин үбүлэниитигэр көмөлөөх буолуоҕун этиннэ.

Мунньахха кэлбит дьон бары — 50 киһи өрөспүүбүлүкэ толоруулаах былааһын отчуотун ылыналларын биллэрдилэр.

 

Февронья ОХЛОПКОВА.