Олунньу 12 күнүн иккис аҥаарыгар Николай Бочков салайааччылаах үһүс бөлөх отчуоттуур үлэтинэн олохтоохтору кытта көрсүһүүтэ Ходоро нэһилиэгэр турда. Нэһилиэнньэ улаатар кэскиллээх, ахсаана сыллата эбиллэр.
Манна отчуот мунньаҕын нэһилиэк баһылыга Виктор Федоров салайан ыытта. Бастатан туран баһылык Виктор Федоров улууспут төрөөбүт күнүгэр Амма өрөспүүбүлүкэтээҕи айан суолун Чүүйэ-Майа кэрчигэр электроуот холбоммутугар олохтоохтор ааттарыттан кэлбит салайааччыларга махталын тиэртэ. Николай Бочков оҥоһуллубут чахчыларга олоҕуран улахан экрааҥҥа бырабыыталыстыба ыытан кэлбит үлэтин 2022-2024 сыллары тэҥнии тутан сиһилии сырдатта. Бу кэннэ нэһилиэнньэ долгутар боппуруостарын ыйытта, этиилэрин тиэртэ.
Манна култуура киинэ саахалланар туруктааҕынан сабыллыбыта икки сыл буолла. Итиннэ үөһэттэн туох үлэ барарын култуура киинин дириэктэрэ Саргылана Атласова ыйытта. Оскуолаттан Валентина Тимофеева, учуутал Лена Аржакова, култуура исписэлииһэ Анисия Барашкова оскуола өрөмүөнүгэр, хаарбах дьиэ бырагырааматынан тутуллубут дьиэ хаһан үлэҕэ киирэрин, Ф.Г.Охлопков аатынан саҥа кыбаарталга тутуллубут дьиэлэргэ гаас хаһан холбонорун, сэрии сылын оҕолоругар Кыайыы 80 сылынан, анал байыаннай дьайыы кыттыылаахтарыгар туох көмөлөр, өйөбүллэр баалларын, медпуун тутуута наадатын, о.д.а. боппуруостары туруордулар.
Элбэх оҕолоох ийэ Вероника Дмитриева социальнай управлениеҕа 5 оҕолооҕунан олорор дьиэни тупсарыы бырагырааматынан 2014 с. уочаракка турбутун, 2024 сылга хас ыал ылбытый, уочараты аһаҕастык киирэн көрөр кыах тоҕо суоҕун ыйытта.
Бааһынай хаһаайыстыба салайааччыта Аркадий Дмитриев ыччаты тыа сиригэр чугаһатарга тыа хаһаайыстыбатын үлэлэрэ буоларын, бу салааҕа көрүллэр көмөлөрү, бэтэринээр өҥөтүн төлөбүрүн быһаарарга эттэ.
Ходоролор успуорт саала, биэлсэр-акушер пуунун тутуу, оскуола, кулууп хапытаалынай өрөмүөннэрэ, Хатыҥнаах эргэ боробуотун сип-хаабылга уларытыы, Күтэр Саахтаахха Ф.Г.Охлопков аатынан кыбаарталга түҥэтиллибит сиргэ гаас киириитин, бөһүөлэк туһаайыытынан суол бэлиэлэрин туруорсар боппуруостарын түмэн баһылык Виктор Федоров бөлөх салайааччытыгар Николай Бочковка туттарда.
Бу курдук нэһилиэнньэ кыһалҕалаах боппуруостарын салайааччылардыын атах тэпсэн олорон быһаарыста. Бөлөх салайааччыта Николай Владимирович олохтоохторго нэһилиэктэрин сайдыытыгар үлэлэринэн-хамнастарынан, туруорсар боппуруостарынан кылааттарын киллэрэллэригэр махтанарын эттэ.
Ходоролор бырабыыталыстыба ыытар үлэтин биһирииллэрин биллэрдилэр.
Марелла Баишева.
