Ходоро нэһилиэгэр Сомоҕолоһуу күнүгэр аналлаах «Бары бииргэ» сэргэх тэрээһин буолан ааста.
В.В.Скрябин аатынан орто оскуолаҕа тэрээһини эҕэрдэ тылынан нэһилиэк баһылыгын солбуйааччы Мария Тимофеева аста. Култуура үлэһиттэрэ муусукаалынай эҕэрдэлэринэн тэрилтэлэр икки ардыгар күөн күрэһи саҕалаатылар. Олохтоох дьаһалта, «Чэчир» оҕо саадын, оскуола-саад, кулууп, бэтэринээр пууна бэрт тэрээһиннээхтик араас омук таҥаһын тиктэрэн, үҥкүүлэрин толорон, бүлүүдэлэрин астаан аҕалан кытыннылар. «Сыккыс» бэтэрээннэр түмсүүтэ мантан эмиэ туора турбата.
Дьүүллүүр сүбэ быһаарыытынан грузин омук үгэһин көрдөрбүт «Сулусчаан» оскуола-саад бастакы миэстэ буолары ситистэ, үөрүү өрөгөйүн биллэ. Иккис миэстэҕэ кытайдыы таҥныбыт орто оскуола кэлэктиибэ, үһүскэ нуучча норуотун көрдөрбүт «Чэчир» оҕо саадын кэлэктиибэ буоллулар. Сахалыы таҥныбыт «Сыккыс» бэтэрээннэр түмсүүлэрэ, узбектыы буолбут дьаһалта, кулууп, бэтэринээр пууна биһирэбил бириистэри ыллылар. Бары кыттыбыттарга харчынан сэртипикээт туттарылынна.
Онон өрөспүүбүлүкэбитигэр олорор араас омуктар астарын, үгэстэрин кытта билсэн, астынан тарҕастыбыт.
Евдокия Исакова.
