Хочоҕо нэһилиэнньэ отчуоттан астынан тарҕаста

Салгыы отчуоттуур бөлөх 2-с Наахара нэһилиэгэр тиийдэ. Манна отчуоту истэ 77 киһи кэлбит. Нэһилиэк баһылыга Петр Никитин улуус баһылыга Дмитрий Тихонов 2024 сыллаах үлэтин отчуотун истэргэ олохтоохтору ыҥырда. Дмитрий Иванович бу сылга ыытыллыбыт үлэни-хамнаһы слайданан көрдөрөн сиһилии сырдатта.

Олохтоохтору долгутар боппуруостары үлэ бэтэрээннэрэ туруордулар. Татьяна Алексеева ыаллыы сытар Бырама, Тиэлиги, Чыамайыкы уонна Хочо нэһилиэктэрин олохтоохторугар сытар куойкалаах балыыһа, амбулатория наадатын, быраас кэлиитин, Елизавета Осипова исписэлиистэргэ толору хааччыллыылаах уопсай дьиэ тутуллуутун, педагогическай үлэ бэтэрээнэ Егор Куприянов тыа хаһаайыстыбатын кэпэрэтиибин тэрийэргэ эттилэр. Норуот эмчитэ, Чурапчыттан олохсуйардыы кэлбит, бэйэ дьарыктаах биир дойдулаахтара Уйгулаана Быкова нэһилиэккэ оҕо былаһаакката наадатын, улууска диализ балыыһатын арыйтарыыга, өбүгэлэриттэн хаалбыт оттуур сир докумуонун оҥорторууга, исписэлиистэр олорор дьиэлэрин туруоруста. Маны сэргэ, электроуот бардаҕына сибээстэрэ тэҥҥэ барбатын наадатыгар Билайн 4G аккумуляторын олордорго, Березовая, Южная уулуссалар остоолболорун уларытарга, сипкабельга холботорго, сантехник  наадатын, үүтү тутар пуун сылытыытын  боппуруостарыгар, кирдээх уу таһыытын сыанатын кыччатыыга  этиилэр киирдилэр. Туһааннаах салайааччылар киирбит ыйытыктарга, этиилэргэ  толору эппиэттэри биэрэн хоруйдаатылар.

Норуот дьокутаата, Ил Түмэн сир сыһыаннаһыыларыгар, айылҕаҕа уонна экологияҕа сис кэмитиэтин бэрэссэдээтэлэ Андрей Находкин “КлиКра сокуонун” туһунан дьоҥҥо-сэргэҕэ быһаарда. Түмүгэр улуус баһылыга Дмитрий Тихонов ааспыт сылга олохтоохтор 4 боппуруоһу туруорбуттарыттан аҥара туолбутун эттэ. “Березовая, Южная уулуссалар уоттарын ситимин оҥоруу былааҥҥа киирбитэ, кэлэр сылга оҥоһуллуо, уу массыынатын туруорсубуккут быһаарыллыбыта” диэтэ. Баһылык олохтоохтор анал байыаннай дьайыыга сылдьар биир дойдулаахтарбытыгар ыытыллар көмөҕө мэлдьи көхтөөхтүк кытталларыгар махтанарын эттэ. Нэһилиэнньэ отчуоттан астынан тарҕаста.

 

Марелла Баишева.