Харалар мэлдьи көхтөөхтөр

Кулун тутар 15 күнүгэр дойду бэрэсидьиэнин быыбара Харатааҕы 285-с нүөмэрдээх быыбардыыр учаастаккка өрө көтөҕүллүүлээхтик саҕаланан, элбэх киһи тоҕуоруһан кэлбит.  

Манна испииһэгинэн 895 быыбардааччылаах. Хамыыһыйа бэрэссэдээтэлинэн Сардана Пестрякова, бэрэссэдээтэли солбуйааччынан Татьяна Степанова, сэкирэтээринэн Сергей Марков, чилиэннэринэн Дария Иванова, Агафья Баишева, Наталья Пестрякова, Петр Захаров үлэлииллэр.

Уопсастыбаннай кэтээн көрөөччүнэн Виктория Попова, бэрээдэги араҥаччылааччынан Виталий Тимофеев олороллор.

Олохтоох дьаһалта баһылыга Дария Назарова, “Майа сэлиэнньэтэ” тыа сирин түөлбэтин баһылыга Алексей Неустроев, култуура управлениетын исписэлииһэ Спиридон Григорьев, И.Г. Игнатьев аатынан спортивнай хайысхалаах орто оскуола бэтэрээн учуутала Дария Попова, бочуоттаах сынньалаҥҥа олорор Василий Дмитриев, о.д.а. бастакынан быыбардаан сокуонунан бэриллибит бырааптарын толору туһаннылар.

Ураты суолталаах күнүнэн бастаан быыбардааччылар Аяна Андреева, Никита Ксенофонтов  улуустааҕы быыбардыыр хамыыһыйаттан сэмэй бэлэх уонна олохтоох дьаһалтаттан нэһилиэктэрин устуоруйатын кэпсиир кинигэни бэлэх туттулар. Испииһэгинэн 18 сааһын саҥа туолбут быыбардааччылар алтыалар, түөртэрэ Дьокуускайтан өрөбүл күн кэлэргэ бэлэмнэрин тиэрдибиттэр.

Киэһээ 19.15 чаастаах түмүгүнэн нэһилиэк 367 олохтооҕо быыбардаан 41 % көрдөрүүнү ситистилэр.

 

Марелла Баишева.