Олунньу 12 күнүнээҕи Николай Бочков салайааччылаах үһүс бөлөх отчуоттуур үлэтин Хара нэһилиэгин олохтоохторун кытта көрсүһүүнэн түмүктээтэ.
Манна отчуот мунньаҕын нэһилиэк баһылыга Дария Назарова салайан ыытта. Кини нэһилиэнньэтэ сыллата улаатарын киэн тутта сырдатта.
Николай Бочков оҥоһуллубут чахчыларга олоҕуран улахан экрааҥҥа бырабыыталыстыба ыытан кэлбит үлэтин 2022-2024 сыллары тэҥнии тутан сиһилии сырдатта. Бу кэннэ нэһилиэк олохтоохторо долгутар боппуруостарын туруордулар.
Быраас Роман Плотников кирдээх уу ханна тиийэрий, тимир суол быһалыы Моҕотой Аартыгынан ааһыа дуо, биэнсийэлээхтэр Ольга Никифорова гаас тарыыба наһаа улааппытын, анал байыаннай дьайыы кыттыылаахтара уоппускаҕа кэллэхтэринэ мэдиссиинэ көмөтүнэн үчүгэйдик хааччыллыахтарын наадатын, Василиса Скрябина Майа алааһын кыбаарталыгар гаас киириитин түргэтэтэргэ, Дария Степанова өрөспүүбүлүкэ таһымнаах “Абалаах” санаторий быстар мөлтөх туруктааҕын, баһылык Дария Назарова өрүһү туоруур федеральнай суол кыһынын тоҕо наһаа хойут арылларый, тыа хаһаайыстыбатынан дьарыктанар дьоҥҥо метан гааһынан хааччыйар заправкалыыр ыстаансыйа кыаллыа дуо диэн эттилэр.
Диализ киинэ хаһан аһылларын, ирбис сыаната үрдүгүн, уматык сыаната тоҕо хонтуруолламматын, тепловизорынан бултааһыны бобуу, о.д.а. ыйытыктар, этиилэр киирдилэр.
Бэтэрээн сэбиэтин бэрэссэдээтэлэ Валентина Бурнашева арыы собуота суоҕунан туттарар үүттэрин Павловскайга илдьэллэрин, сэрии сылын оҕолоругар дьиэ өрөмүөнүгэр 2 сылга биирдэ бэриллэр көмө харчы кыратын, дьиэ тутуутугар аҕам саастаахтарга көмө харчы көрүллэрэ наадатын тиэртэ. Кэлбит салайааччылар нэһилиэнньэ туруорар боппуруостарын сиһилии быһааран, сөптөөх хоруйдары биэрдилэр.
Отчуоттуур бөлөххө Ил Түмэн дьокутаата Олег Марков кыттыыны ылла. Кини: “Манна Ил Түмэн дьокутааттара дьон олорор сиригэр бастаан гаас киириэхтээх, онтон дьон дьиэлэрин туттуохтаах диэн “Сахатранснефтегаз” тэрилтэни кытта гаастааһын боппуруоһугар үлэлэһэ сылдьабыт. Ирбис сыаната үрдүү турарынан биһиги улууспут баһылыга Дмитрий Тихонов этии киллэрэн, илин эҥэр улуустары кытта ирбис атыылаһарга үлэлэһэбит, бу быһаарыллара олох кыра хаалла. Чааһынай дьиэҕэ олорор саастаах дьон эдэрдэригэр туттубут дьиэлэрэ бэйэлэрин кытта тэҥҥэ сааһырар, туруга мөлтүүр, бу уустук боппуруос, ол эрэн нэһилиэнньэҕэ барытыгар буолбакка, тыыл уонна үлэ бэтэрээннэригэр хаарбах дьиэттэн көһүү бырагырааматын киллэрэргэ үлэлэһэбит”, — диэтэ.
Түмүккэ, баһылык Дария Ивановна И.Г.Игнатьев аатынан Харатааҕы спортивнай орто үөрэхтээһин оскуолатын дириэктэрин үөрэх чааһыгар солбуйааччы Анна Кононовна Антоноваҕа «СӨ үөрэҕириитин үтүөлээх үлэһитэ» үрдүк аат иҥэриллибитинэн эҕэрдэ суругу уонна нэһилиэк өрөгөй бэлиэтин, отчуоттуур бөлөх салайааччытыгар Николай Владимировичка махтанан туран нэһилиэгин өрөгөй бэлиэтин үөрүүлээх быһыыга-майгыга туттарда.
Өрөспүүбүлүкэ бырабыыталыстыбатын отчуотун 66 киһи иһиттэ, 100 бырыһыан биһирииллэрин биллэрдилэр.
Марелла Баишева.
