Хаптаҕай агрооскуолатын пришкольнай учаастагар сайын аайы араас суортаах оҕурсууну, помидору, кабачогу, переһи, моркуобу, сүбүөкүлэни олордоллор.
Производственнай маастардар Светлана Николаевна Кононова, Астра Николаевна Сидорова, Людмила Александровна Слободчикова кыһаллан көрөллөр, күһүн өлгөм үүнүүнү хомуйарга туруналлар.
«Быйыл саас «Хаппыыста сиэмэтин олордуу» биисинэс-былааны көмүскээн улуус баһылыгын гранын ылбыппыт. Хаппыыста сиэмэтин ыларга икки сыл көрөҕүн, онон чинчийэргэ хас да суорду ‒ «Слава 1305», «Зимовка», «Белорусская 445», «Стахановка» олортулар. Людмила Александровна фенологическай кэтээн көрүүнү, биометрическэй кээмэйдэри оҥорор», ‒ диэн кэпсээтэ агроном үөрэхтээх, агрохайысха мэтэдиичэскэй холбоһугун салайааччыта Мария Михайловна Слободчикова.
Маны тэҥэ хас да сыллааҕыта оскуола таһыгар олордуллубут отонноох үүнээйилэри Екатерина Романовна Гаврильева кыһамньылаахтык көрөр.
«Росток» үлэ-сынньалаҥ лааҕыра икки сезон үлэлээтэ. Бастакыга Анна Александровна Адамова, иккискэ Антонова Айталина Альбертовна, Валентина Константиновна Петрова иитээччинэн үлэлээтилэр. Оҕолор сибэккилэргэ уу кутан, сыыстааһыҥҥа көмөлөстүлэр. Астына сынньаннылар, араас куонкурустарга, күрэхтэһиилэргэ кытыннылар.
Анастасия Колесова
