Хаптаҕай нэһилиэгиттэн «Күөгэйэ» түмсүү – өбүгэ сиэрин-туомун толоруу бэстибээлин кыайыылааҕа

Аҕыс иилээх-саҕалаах Аан Ийэ дойду айыллыаҕыттан, иэгэйэр икки атахтаах, иннинэн сирэйдээх, бокуйар сүһүөхтээх Урааҥхай саха дэнэн бу баччааҥҥа диэри киһи төрдө буолан кэллэхпит.

Ол усталаах-туоратыгар Үөһээ үрдүк Айыыларга, Иччилэргэ сүгүрүйэн, быстыбат быйаҥнанан, уостубат уйгуланан, удьуорбутун ууһатан, сыдьааммытын кэҥэтэн, үөрэх-билии ылан, үүнэн-сайдан кэллибит. Былыр өбүгэлэрбит суругу-бичиги билбэт этилэр, ол оннугар айылҕа араас кистэлэҥнэрин билэр буолан, кинини кытта бииргэ алтыһан, харыстаан, сиэри-туому толорон, олохторун оҥостоллоро.

Аллараа Бэстээх бөһүөлэгин култуура дьиэтигэр Г.Колесов аатынан Олоҥхо дьиэтин үлэһиттэрин тэрийиитинэн сиэри-туому толорууга “Өбүгэ сиэрэ-туома” аһаҕас күрэх аан бастакытын ыытылынна. Аллараа Бэстээхтэн, Хаптаҕайтан, Майаттан, Нөөрүктээйиттэн кыттааччылар өбүгэлэрбититтэн тиийэн кэлбит төрүт итэҕэлбит сиэрин ситэрэн, туомун толорон, бар дьоммутугар көрдөрдүлэр.

Дьүүллүүр сүбэҕэ ытык-мааны алгысчыт, сиэри-туому тарҕатааччы, СӨ Дархан олоҥхону толорооччута, тойуксут Петр Тихонов-Тэрчи, «Эрэл” саха төрүт үҥкүүтүн ансаамбылын салайааччыта, СӨ култууратын үтүөлээх үлэһитэ Сима Толстякова, Мэҥэ Хаҥалас улууһун култуураҕа уонна духуобунай сайдыыга управлениетын сүрүннүүр үлэһитэ, алгысчыт Спиридон Григорьев-Илгэлээх Испирдиэн, Мэҥэ Хаҥалас улууһун Г.Колесов аатынан Олоҥхо дьиэтин салайааччыта  Евдокия Иванова үлэлээтилэр.  

Кыттааччылар сиэри-туому толороллоругар бука бары таҥастарын-саптарын, туттар малларын-салларын оҥостон, бэлэмнэнэн кэлбиттэрин дьүүллүүр сүбэ хайҕаата, инники өттүгэр тылларыгар-өстөрүгэр, хамсаныыларыгар болҕомтону ууралларыгар баҕа санааларын эттилэр.

Дьүүллүүр сүбэ быһаарыытынан 3-с үрдэли Нөөрүктээйи нэһилиэгиттэн «Айыы алаһата» түмсүү «Дьөһөгөй ый туома» ылла (бириис – 5000 солк.); 2-с үрдэл – «Салама ыйааһын сиэрэ-туома» Майа сэлиэнньэтин «Кыталык» киинин иһинэн дьарыктанар Түһүлгэ» түмсүүтэ (бириис – 8000 солк.); 1-кы үрдэл – «Кымыс иһиитин сиэрэ-туома» Аллараа Бэстээх бөһүөлэгиттэн «Айыллыы» түмсүү (бириис – 10000 солк).

Кылаан чыпчаал кыайыылааҕынан «Айыыһыты атаарыы сиэрэ-туомун» уонна «Кийиит кыыһы таҥыннарыы сиэрин-туомун» көрдөрөн Хаптаҕай нэһилиэгин «Күөгэйэ» түмсүүтэ буолла (бириис – 15000 солк.).

Олоҥхо дьиэтин кэлэктиибэ тэрийээччилэр аатарыттан бука бары кыттыбыт түмсүүлэргэ, нэһилиэктэргэ махталын биллэрэр.