Ахсынньы 24 күнүгэр улуус баһылыгын Дмитрий Тихонов 2024 сыллааҕы үлэтин отчуота Хаптаҕайга туруорулунна.
Отчуоттуур бөлөххө СӨ Ил Түмэн Судаарыстыбаннай Мунньах сир сыһыаннаһыыларыгар, айылҕа ресурсаларыгар уонна экологияҕа кэмитиэтин бэрэссэдээтэлэ Андрей Находкин, улуус Сэбиэтин бэрэссэдээтэлэ Иннокентий Андросов, дьокутаата Михаил Масаха, улуус управлениеларын уонна тэрилтэлэрин салайааччылара, солбуйааччылара кыттыына ыллылар.
Нэһилиэк элбэх хайысхалаах култуура киинигэр 55 олохтоох түмсэн отчуоту иһиттэ. Дмитрий Иванович 2024 сыл устата Мэҥэ Хаҥалас бары хайысхаларыгар барбыт үлэлэри сиһилии билиһиннэрдэ.
Хаптаҕай олохтоохторо сылын ахсын туруорсар этиилэрин – саҥа оскуола, култуура дьиэтин тутуутун эттилэр. Оттон өрүһү туоруур муоста олохтоорго туох уларыйыы аҕаларын, тутуутун үлэтэ айылҕаҕа охсуутун аччатар туох хонтуруол баарын, Чыамайыкыга алмаас хостооһунун туһунан ыйыттылар.
Улуус бары дьонун долгутар «КлиКра сокуонун» Андрей Находкин быһааран биэрдэ. Кэтэх хаһаайыстыбаны өрө көтөҕөргө Михаил Масаха бэйэтин холобурунан сиһилии кэпсээтэ.
Хаптаҕай нэһилиэгин олохтоохторо байыаннай дьайыыга сылдьар дьоҥҥо күүс-көмө буолалларыгар Дмитрий Тихонов махтанна.
Иван Лукин.
