Ахсынньы 14 күнүгэр хабылык, хаамыска көрүҥэр улууспут үөрэнээччилэрин комплекснай ыспартакыйаадата буолан ааста.
15 оскуолаттан 128 спортсмен кытынна. Соторутааҕыта «Саха Өрөспүүбүлүкэтин маастара» үрдүк ааты ылбыт Тиэлиги үөрэнээччилэрин Аэлита Алексееваны, Ян Захаровы эҕэрдэлээн туран оҕолорго билиһиннэрдибит, тириэньэрдэригэр Антонина Фёдороваҕа улуустааҕы үөрэх управлениетын уонна улууспут Федерациятын аатыттан Махтал суруктары туттардыбыт.
Хамаандаларга үс бөлөҕүнэн оскуолаларын чиэһин көмүскээтилэр. Бөлөхтөрүнэн түмүк бу курдук буолла. Бастакы бөлөххө бастакы Төҥүлү, иккис Аллараа Бэстээх 1 №-дээх, үһүс миэстэ Майатааҕы лиссиэй буоллулар. Иккис бөлөххө бастакы Тиэлиги, иккис Мэлдьэхси, үһүс миэстэҕэ Наахара оскуолалара таҕыстылар. Үһүс бөлөххө бастакы Чыамайыкы, иккис Бэдьимэ, үһүс миэстэ Бырама үөрэнээччилэрэ буоллулар.
Биирдиилээн бастыыр иһин уопсай түмүккэ Тиэлиги, Чыамайыкы, Бэдьимэ, Төҥүлү, Майатааҕы лиссиэй, Бырама оҕолоро миэстэлэһэн грамотанан, мэтээлинэн бэлиэтэннилэр, салгыы сайдарга тирэх ыллылар.
Екатерина Попова. Бэдьимэ
