Хабылыкка, хаамыскаҕа улуус чөмпүйэнээтигэр

Олунньу 1 күнүгэр Аллараа Бэстээххэ «Парус» успуорт саалатыгар хабылык, хаамыска көрүҥэр улуус чөмпүйэнээтэ ыытылынна.

Чөмпүйэнээккэ  22 нэһилиэктэн 148 киһи көхтөөхтүк кытынна.

Кэлбит спортсменнары успуорт управлениетын начаалынньыга Алексей Попов, саҥа анаммыт Федерация бэрэссэдээтэлэ Иннокентий Павлов эҕэрдэлээтилэр. Күрэхтэһии сүрүн судьуйатынан Иннокентий Максимов, сэкирэтээринэн Олег Петров үлэлээтилэр.

Биирдиилээн бастыыр иһин күрэхтэһиигэ саастарынан, бөлөхтөрүнэн кыайыылаахтар анал мэтээлинэн, грамотанан бэлиэтэннилэр. Муҥутуур кыайыылаахтарынан эдэр оонньооччулар Нелли Емельянова (Бэдьимэ), Артур Сивцев (Тиэлиги) буолан харчынан бириэмийэ туттулар.

Бөлөхтөрүнэн түмүк маннык буолла: бастакы бөлөххө бастакы миэстэ Хара, иккис Майа, үһүс Төҥүлү, иккис бөлөххө бастакы Тиэлиги, иккис Бэдьимэ, үһүс Матта, үһүс бөлөххө бастакы Чыамайыкы, иккис Ороссолуода, үһүс Баатара нэһилиэктэрин хамаандалара таҕыстылар.
Екатерина Попова.