Алтынньы 19 күнүгэр Аллараа Бэстээххэ «Парус» успуорт комплексыгар улууспут үөрэнээччилэригэр национальнай көрүҥнэргэ ыспартакыйаада чэрчитинэн сахалыы остуол оонньууларыгар чөмпүйэнээт ыытылынна.
15 оскуолаттан 55 оҕо кыттыыны ылла: 30 кыыс, 25 уол.
Биирдиилээн бастыыр иһин күрэхтэһиигэ кыргыттарга Аэлита Алексеева (Тиэлиги) бастакы, Саина Таныкова (Төҥүлү) иккис, Лера Сергеева (Бэдьимэ) үһүс миэстэ буоллулар. Уолаттарга Ян Захаров (Тиэлиги), Артур Сивцев (Аллараа Бэстээх), Антон Захаров (Чыамайыкы) кыайыылааҕынан буолан улуустааҕы успуорт управлениетын грамотатынан, анал мэтээлинэн наҕараадаланнылар.
Уопсай түмүккэ бастакы миэстэ Тиэлиги, иккис Чыамайыкы, үһүс Төҥүлү хамаандалара буоллулар. Оскуолаларыгар наадалаах очукуолары аҕаллылар.
***
Алтынньы 20 күнүгэр сахалыы остуол оонньууларыгар улахан дьоҥҥо комплекснай ыспартакыйаада Хара нэһилиэгэр «Чыпчаал» комплекска бэрт тэрээһиннээхтик ыытылынна.
Кэлбит спортсменнары култуура үлэһиттэрэ сылаас алаадьынан, итии чэйинэн көрүстүлэр. Улуус физическэй култуураҕа уонна успуорка управлениетын исписэлииһэ Виталий Пестряков, Хара нэһилиэгин баһылыгын солбуйааччыта Николай Дьячковскай эҕэрдэ тылы эттилэр, Мария Романова ырыатын бэлэхтээтэ.
9 нэһилиэктэн 41 киһи кытынна. Хамаандаҕа 6 киһи оонньоото: 18‒40, 41‒55, 56 сааһыттан үөһээ биирдии дьахтар, биирдии эр киһи.
Быйылгы күрэхтэһии бэрт интэриэһинэйдик барда. Нэһилиэктэр икки бөлөххө хайдан хабылыкка уонна биэстээх хаамыскаҕа утарыта оонньоотулар. Бөлөххө кыайбыттар полуфиналга уонна финалга тыҥааһыннаах киирсиилэри көрдөрдүлэр. Сөкүүндэнэн эрэ урутааһыннар да бааллар.
Финал түмүгүнэн Майа хамаандата бастаата, тиэлигилэр иккис, бэдьимэлэр үһүс миэстэлэннилэр. Кыайыылаахтар успуорт управлениетын грамотатынан, анал мэтээллэринэн наҕараадаланан кыайыы өрөгөйүн биллилэр. Сүрүн судьуйа Иннокентий Максимов күрэхтэһиини чуолкайдык ыытта. Хара, Чыамайыкы, Төҥүлү, Павловскай, Матта, Догдоҥо спортсменнара бэйэлэрин нэһилиэктэригэр сүрүн ыспартакыйаадаҕа наадалаах очукуолары биэрдилэр, өссө да араас таһымнаах күрэхтэһиилэр буола туралларыгар баҕардылар.
***
Алтынньы 21 күнүгэр остуол оонньууларыгар улуус бастыҥ тириэньэрэ Антонина Федорова Тиэлигигэ «Мин ийэтинээн», «Мин аҕабынаан» диэн троеборьеҕа (хабылык, хаамыска, остуол тенниһэ) дьиэ кэргэттэргэ күрэхтэһиини тэрийэн ыытта.
Көрүҥ аайы мэтээллэр, грамоталар бэлэмнэннилэр. Тэрийээччилэр Чыамайыкыттан Дария Брызгалова, Розалина Романова, Владислав Попов, Антон Захаров, Аллараа Бэстээхтэн Мария, Айсария Кривогорницыналар хамаандаларыгар уонна Тиэлигиттэн кыттыбыт бары дьиэ кэргэттэргэ барҕа махталларын тиэрдэллэр.
Екатерина Попова, улуустааҕы сахалыы остуол оонньууларын федерациятын сэбиэтин чилиэнэ.
Бэдьимэ.
