Олунньу 12 күнүгэр Саха Өрөспүүбүлүкэтин бырабыыталыстыбатын 2023 сыллаах үлэтин отчуоттуур үһүс бөлөх үлэтин 2-с Тыыллыма нэһилиэгиттэн саҕалаата.
Саха Өрөспүүбүлүкэтин гражданскай оборона дьыалаларыгар уонна нэһилиэнньэҕэ куттал суох буолуутун хааччыйыыга миниистири солбуйааччы Никита Павлов салайааччылаах бөлөххө Тырааныспар уонна суол хаһаайыстыбатын министиэристибэтин Уу уонна тимир суол тырааныспарын департаменын кылаабынай исписэлииһэ Владимир Новиков, Үөрэх уонна билим министиэристибэтин Үөрэх эйгэтигэр хонтуруоллааһыҥҥа уонна кэтээн көрүүгэ департаменын салайааччыта Михаил Колмаков, СӨ «Олорор дьиэни тутууга дирекция» тэрилтэтин кэтээн көрүүгэ салаатын начаалынньыгын солбуйааччы Юрий Маччасынов, Үлэ уонна социальнай сайдыы министиэристибэтин бэрэстэбиитэлэ – улуустааҕы нэһилиэнньэ социальнай көмүскэллээх буолуутун управлениетын начаалынньыга Иван Шестаков үлэлээтилэр. Бөлөххө улуус баһылыгын бастакы солбуйааччы Василий Михайлов, управлениелар салайааччылара, эппиэттээх үлэһиттэрэ нэһилиэнньэ ыйытыыларыгар хоруйдаатылар.
Бырабыыталыстыба бөлөҕүн салайааччы Никита Павлов ааспыт сыллаах үлэни кылгастык билиһиннэрбитин кэнниттэн Хаатылыма олохтоохторо ыйытыыларга, этиилэргэ көхтөөхтүк кытыннылар. Кинилэри бу дьоҕус нэһилиэк сайдыытын, инники кэскилин боппуруоһа ордук долгутарын туһунан Михаил Афанасьев эттэ. Манна бэс чагдалаах, тыытыллыбатах кэрэ айылҕалаах сиргэ дьон сынньанар киинин, эбэтэр эмтэнэр дьиэтин арыйан, биитэр туризмы сайыннарар буоллар, олохтоох дьон дьарыктаах буоларын ситиһиэ этибит диэтэ. Өр сыл хачыгаарынан үлэлээн кэлбит киһи, бу ыарахан үлэҕэ сылдьар дьону үрдэтиллибит биэнсийэ көрүллэр араҥаҕа киллэрэр наадатын ыйда.
Туйаара Попова анал байыаннай дьайыыга сылдьар дьон дьиэ кэргэннэригэр көрүллэр көмө, кинилэргэ сир учаастагын биэрии, Владимир Афанасьев Арассыыйа таһымыгар саҥа ылыллыбыт сылгы иитиитигэр туһуланар сокуон туһунан ыйыталастылар. Александра Дмитриева, Екатерина Игнатьева бөһүөлэк сирэ кумах буолан итиэннэ сир тымыра чугаһынан, хаарбах дьиэттэн көһөрүү бырагырааманан тутуллар 2 этээстээх саҥа таас дьиэ хамсыыр кутталааҕын, онон урукку курдук хорууну ыраастыыр, аһар-сабар дьаһалы сөргүтэргэ, сири-уоту чинчийэн үөрэтэргэ, онуоха көмө эрэйэллэрин бэлиэтээтилэр.
Хаатылымалар суотабай сибээс кэлиитин туруорсаллар. Манна икки сыллааҕыта дьиэлэргэ куйаар ситимэ кэлбитэ, ол эрээри мобильнай сибээс суоҕа сайдыыны харгыстыырын эттилэр.
Улуус мунньаҕар дьокутааттара Михаил Масаха сотору Өлүөнэ эбэни туоруур муоста тутуллуо, Хаатылыманан айан-сырыы үксүө, онон суолу оҥорууну туруорсуохха диэтэ. Кыра нэһилиэктэр сайдыыларын, ыччаты олохсутуу боппуруостарын өрөспүүбүлүкэ таһымыгар үөрэтиэххэ диэн ыҥырда.
Олохтоохтору долгутар ыйытыктар сөпкө туруоруллалларын, ону быһаарыыга ханнык суол-иис баарын туһунан сүбэлээн Ил Түмэн дьокутаата Андрей Находкин санаатын үллэһиннэ.
Мунньаҕы 2-с Тыыллыма нэһилиэгин баһылыга Айсен Спиридонов салайан ыытта. Кыһынын бөһүөлэккэ 60-ча киһи олороруттан 20 киһи култуура киинигэр кэлэн отчуоту иһиттэ итиэннэ өрөспүүбүлүкэ бырабыыталыстыбатын үлэтин биһирииллэрин биллэрдилэр.
Февронья ОХЛОПКОВА.
