Олунньу 18 күнүгэр Аллараа Бэстээххэ Т.А.Пинегин аатынан «Парус» успуорт уораҕайыгар бэһис төгүлүн ыытыллар өрөспүүбүлүкэтээҕи «Муус Устар» бэстибээл чэрчитинэн ыччаты патриоттуу иитиигэ, эти-хааны сайыннарарга туһуламмыт Бүтүн Арассыыйатааҕы физическэй култуура-успуорт ГТО («Готов к труду и обороне») комплексыгар уонна «Сила в единстве: основы военной подготовки и патриотического воспитания» өрөспүүбүлүкэтээҕи күрэхтэр улуустааҕы түһүмэхтэрэ буолан ааста.
Улуустааҕы күрэххэ эдэр ыччаттар уонна Р.И.Брызгалов аатынан Аллараа Бэстээхтээҕи тырааныспар техникумун устудьуоннара кыттыыны ылан бэйэлэрин сатабылларын, кыахтарын, дьоҕурдарын холонон көрдөрдүлэр. Күрэх түмүгүнэн кыттыыны ылбыт ыччаттар үрдүк бэлэмнээхтэрин тэрийээччилэр бэлиэтээн эттилэр.
Анастасия Соколова, мас тардыһыытыгар Арассыыйа успуордун маастара:
— Бүгүҥҥү күрэхтэһиини наһаа үчүгэйдик бэлэмнээбиттэр. Судьуйалар барытын сөпкө сыаналаатылар, күрэхтэһии муниципальнай түһүмэҕэ этэҥҥэ ааста. Бу түмүгүнэн өрөспүүбүлүкэҕэ кытта барар хамаанданы сүүмэрдиэхтэрэ, кыттааччылары быһаарыахтара. Ким бэлэмнээх, ким дьарыктаах – кыайыыны аҕаллын! Чөл олоҕу тутуһуҥ! Успуорт киһини үрдүккэ сирдиир! Доруобай буолуҥ!», – диэн ыччаттарга ситиһиини баҕарда.
Иван Лукин.
