Бу биэриини бээтинсэ ахсын киэһэ аайы кэтэһэр саха ыала элбэх буолуохтаах диэн сэрэйэбин. Дьон өйүн-санаатын, дууһатын тугунан сүүйэрий диэн таайа сатыыбын. «Кто хочет стать миллионером» бастакы ханаалга кэлэр Дмитрий Дибров салайан ыытар биэриитин кытта ханан эрэ тэҥнии тута сатыырым. Онно боппуруостара балайда уустугун таһынан, кыттааччылары кытары атын тиэмэлэргэ туора халыйан, халбарыйан кэпсээннэрэ-сэһэннэрэ ыраахха диэри тэнийэрэ. Итинтэн көрөөччү сылайа, салҕа быһыытыйар буолуохтаах. Эфиргэ бириэмэлэрэ дэлэйиттэн сороҕор сөҕөрүм. Бу биэриини кэлин Юлианна Караулова иилээн-саҕалаан ыытар буолуоҕуттан санаабар быдан ордук курдук буолла.
Онтон «Саха” НКИХ ханаалыгар Георгий Белоусов барытын уурбут-туппут курдук сааһылаан сып-сап ыытарынан уратылардаах.
- Биэрии ис хоһоонугар киирэн дьиэ кэргэнинэн боппуруостары кыаххынан таайа сатыыгын. Бэйэҕинэн кыттыһар буолаҥҥын интэриэс баар.
- Эҥин-эгэлгэ дьикти боппуруостары сэргэ, Саха сиригэр сыһыаннаах ыйытыктар бааллара болҕомтону күүһүрдэн биэрэр. Көрөөччү ыйытыга киирбитэ биэриини байытар. Уопсайынан, саамай сөбүлээбиккин бэлиэтэнэн иһэриҥ наада.
- Араас идэлээх, толкуйдаах, таһымнаах дьон кэлэн оонньоон, көстөн бараллара сэргэх.
Бэс ыйын 23 күнүгэр бүтэһик түһүмэҕи- финалы көрдүбүт. «Тумарык” сериал геройдара Ульяна, Петр уонна Дьокуускайга олорор, Мэҥэ-Хаҥаластан төрүттээх бииргэ төрөөбүттэр Татьяна, Евгений оонньоотулар. Балайда тэҥ хатыһыылаах оонньууга Наахаралар кыайдылар. Бу да иннинээҕи түһүмэхтэргэ Евгений элбэҕи ааҕан билэрэ-көрөрө, өйдүүрэ, үксүгэр сөптөөхтүк ырытара сөхтөрбүтэ. 2021 с. Майа эдэр уолаттара Павел Судико, Олег Петров эмиэ кыайыылаах тахсыбыттара. Онон, Петр Цыпандины эбии ааҕынан туран биһиги Мэҥэлэр билиҥҥитэ үчүгэйдик кыттан иһэбит диэн суоттанабыт.
Тиһэххэ маннык санааларга тохтуубун:
1.Кэлэр кэмнэргэ финалга тахсан баран «Саха” НКИХ сүрүн бирииһин кыайан ылбатах кыттаачыларга сөптөөх спонсор көстөрө буоллар, өй-санаа, билии-көрүү күрэҕэр суолта бэриллэрин биир туоһута буолуох этэ.
2. Ааспыт сыллар кыайыылаахтарын туһунан биирдэ эмит кылгастык сырдатан ааһара буоллар. Холобура, үөһээ ааттаммыт дьону, онно эбии Вячеслав Коротовы, Федор Рахлеевы киллэрэн туран.
3.Бу биэрии уота-күөһэ умуллубакка бара турарыгар баҕаран туран, кэлин сылларынан сааһыланан, боппуруостары, кыттыбыт дьону, кыайыылаахтары киллэрэн туран бэртээхэй, интэриэһинэй, пуолкаҕа быыллыйан сыппат үтүөкэн кинигэ тахсарыгар эрэллээхпин. Маны биллэн турар, Георгий Белоусов эрэ быһаарар кыахтаах.
Түмүкпэр көрөөччүлэр ааттарыттан өйөбүлүн иһин «Саха” НКИХ генеральнай дириэктэригэр Олег Марковка махталбытын тиэрдэбит.
Степан Андреев, Майа с.