Баатара нэһилиэгин Өргөннөөх учаастагар хойуу, минньигэс үүттээх, аһылыгар талымаһа суох, тымныыны тулуйумтуо, ыарыыга бэриммэт саха боруодата сүөһү сылтан сыл ахсаана элбээн иһэр.
“Саха сүөһүтэ” тэрилтэ “Өргөннөөх” салаатын хаһаайыстыбата манна 3 кыстыгы этэҥҥэ туораата. Атыыр оҕуһунан буоһатыы ньыматынан саха сүөһүтүн элбэтэр, тэнитэр сүрүн сыаллаах үлэлииллэр. Бастакы сыл 48 хороҕор муостаахтан саҕалаан, билигин сүөһү ахсаана 120-ҕэ тиийдэ, ол иһигэр 40 ыанар ынах, 25 ньирэй, 4 атыыр оҕус бааллар. Быйылгы кыстыгы 176 туонна отунан туораатылар.
Ил Дархан Айсен Николаев «СӨ тыа хаһаайыстыбатын сайдыытын стратегическай хайысхаларын туһунан» ыйааҕар олоҕуран саха сүөһүтүн ахсаанын элбэтэргэ Баатара нэһилиэгин Өргөннөөх учаастагар аныгылыы каркас-сэндвич панель матырыйаалынан 100 хороҕор муостаах турар хотоно тутуллубута.
Билигин учаастакка салайааччынан Василий Жирков, ыанньыксытынан Филипп Соловьев, Александр Соловьев уонна сайыҥҥы кэмҥэ дуогабарынан Павел Филиппов үлэлииллэр.
Ыанньыксыттар быйыл 40 ынаҕы илиилэринэн ыаннар, 3 туонна үүт туттарар былааннарын аҥаарын толордулар. Үлэҕэ-хамнаска көрсөр сүрүн кыһалҕабыт – ардахха уонна күһүн-саас суолбут алдьанара диэн этэллэр.
Саҥа икки олорор дьиэ, бааньык тутуллан, электроуот, интэриниэт, спутнигынан тэлэбиидэнньэ киирэн, үлэһиттэргэ бары усулуобуйа барыта баар.
Гульнара Аммосова,
Иван Лукин.