Өрөспүүбүлүкэтээҕи Ыччат парламена Мэҥэ Хаҥалас ыччатын кытта көрүстэ

Тохсунньу 31 күнүгэр Р.Г.Васильев аатынан кыраайы үөрэтэр мусуойга Ил Түмэн Судаарыстыбаннай мунньах иһинэн Ыччат парлеменын кыттыылаахтара улууспут ыччаттарыгар «Познавать, чтобы созидать» сэминээри ыытта. Улуустааҕы дьиэ кэргэн бэлиитикэтин упраылениета сүрүннээтэ (начаалынньык Октябрина Кулешова).

Тэрээһиҥҥэ улууспут нэһилиэктэриттэн ыччаты кытта үлэҕэ исписэлиистэр, актыбыыстар кытыннылар.

Ыччат Парламенын бэрэссэдээтэлэ Антон Васильев киирии тылыгар бэйэтин билиһиннэрииттэн саҕалаата. Идэтинэн суруналыыс, билигин «Саха» национальнай көрдөрөр-иһитиннэрэр хампаанньа интернет ситимин сулууспатын салайааччыта. Ыччат парламена Ил Түмэн иһинэн тэриллибит хамсааһын сүрүн соруга ‒ энтузиаст ыччаты көҕүлээһин, каадыры бөҕөргөтүү.

Антон Анатольевич сүрүн болҕомтотун Парламент бырайыактарын билиһиннэриигэ туһаайда. Ааспыт сылга Өктөмҥө «Николаевскай пуоуруму» тэрийбиттэр. Эдэр исписэлиистэрин болҕомтотун тардыбыт киэҥ ыҥырыылаах пуорумҥа сүүһүнэн ыччат кыттыбыт. Бастакы Бэрэсидьиэн Михаил Ефимович Николаев сырдык аатын үйэтитиигэ анаммыт. Мунньах эрэ буолбакка ыччаттар пуорумҥа араас бырайыактары толкуйдаабыттар, бастыҥнары быһаарбыттар. Сүрүн болҕомто өрөспүүбүлүкэ салалтатыгар каадыр бэлиитикэтин сайыннарыыга туһуланар. Лиидэр ыччаттары көҕүлүүр, инники күөҥҥэ таһаарар кыаҕы үөскэтэр. Ыччат төрөөбүт тылынан саҥарыытын өрө тутар, уопсастыбаҕа сыһыан култууратын иҥэрэр соруктаахтар.

Иккис бырайыактара ‒ «Труд14». Улаатан эрэр оҕо үлэҕэ сыһыанын, бастакы хамнаһы аахсыы олуктарын уурсар аналлаах.

Ыччат пардаменын кыттыылаахтара улуустарынан көҕүлүүр сэминээрдэри ыытарга соруктанан биһиги улууспут ыччаттарын кытта көрсүһүүлэрэ инники көдьүүстээх буоларыгар эрэнэллэр.

Сэминээргэ лиэксийэлэри иһиттилэр. Кэммиэрчэскэйэ суох уопсастыбаннай холбоһуктар эспиэртэрэ Майя Дмитриева грант куонкуруһугар кыттыы, докумуону сөпкө толоруу ымпыгын-чымпыгын билиһиннэрдэ. Ыччат министиэристибэтиттэн Евгения Федорова гранынан үлэҕэ нейросеть өйдөбүлүн, полиция хапытаана Ольга Васильева «Кибербезопасность», масыанньыктартан көмүскэллээх буолууга, СӨ финансовай грамотноска киинин салайааччыта Татьяна Борисова үбү-харчыны сатаан туһаныыга үөрэҕи ыыттылар.

Марфа Птицына.