Өрөспүүбүлүкэ сиригэр-уотугар электрическэй уотунан хааччыллыы бигэ туруктаах буолуутун үрдэтиигэ бүгүн Майаҕа СӨ Ил Дархана Айсен Николаев «Россети» ПАУо «МЭС Востока» 220 кВ «Майа» подстанциятыгар сүбэ-мунньаҕы салайан ыытта.
Сүбэ-мунньахха СӨ ДьУоКХ уонна энергетикэҕэ миниистирэ Вячеслав Емельянов электроэнергетикэҕэ сыһыаннаах тэрилтэлэр 2023‒2024 сс. кыстыкка бэлэмнэниигэ үлэлэрин хаамыытын, «ФСК ЕЭС» ПАУо «МЭС Востока» Дьокуускайдааҕы филиалын дириэктэрэ Александр Львов 220 кВ Майаҕа уонна Томмокко подстанцияларыгар уларытыылары киллэриигэ тэрээһин үлэлэргэ, «Якутскэнерго» ПАУо генеральнай дириэктэрэ Гаврил Алексеев, «Сахаэнэрго» АУо генеральнай дириэктэрэ Петр Кондратьев «Русгидро» ПАУо иһигэр киирэр хампаанньаларга саахал тахсыытын аччатарга туһуланар үлэ-хамнас туһунан иһитиннэриилэри оҥордулар.
Тэрээһин киэҥ ыҥырыылаах ааста. Видео сибээс нөҥүө мунньахха РФ Бэрэсидьиэнин Уһук Илин уокуругар боломуочуйалаах бэрэстэбиитэлин аппараатыттан, СӨ борокуратууратыттан, ситэриилээх былаас федеральнай уорганнарыттан, СӨ Бырабыыталыстыбатын чилиэннэрэ, «Русгидро» ПАУо, ситэриилээх былаас олохтоох уорганнарыттан муниципальнай оройуоннар баһылыктара кыттыыны ыллылар.
‒ Бүгүн Майа подстанциятыгар ыытыллыбыт сүбэ-мунньахха энергетикэ хампаанньалара уонна олорор дьиэ-уот хомунаалынай хаһаайыстыбаларын тэрилтэлэрэ кыстыкка киириигэ бэлэмнэрин туһунан ырытыстыбыт, үлэ хаамыытын билистибит, ‒ диэтэ суруналыыстарга Айсен Николаев. ‒ Тыйыс усулуобуйалаах эрэгийиэҥҥэ бу тыын суолталаах боппуруос буоларын бары билэбит. Өрөспүүбүлүкэбитигэр сарсыҥҥыттан оттук кэмэ ыраах Аллайыаха улууһуттан саҕаланар. Сотору кэминэн өрөспүүбүлүкэ бүттүүнэ кыстыкка үктэниэҕэ. Бүгүҥҥү күҥҥэ өрөспүүбүлүкэ үрдүнэн кыстыкка бэлэмнэнии былаан быһыытынан баран иһэр. Бэлэммит куһаҕана суох. Дьокуускай куорат сорох тэрилтэлэригэр уустуктар бааллар, ол да буоллар, барыта быһаарыллыаҕа диэн эрэнэбит, онуоха үлэ барар.
Ил Дархан былырыын Майа, Томмот подстанцияларыгар тахсыбыт саахаллар биричиинэлэрин туоратыыга ирдэбил күүскэ барарын, бырайыактааһыҥҥа айылҕа тыйыс усулуобуйата аахсыллыбатаҕын туоратыыга «ФСК ЕЭС» 2 млрд солк. суумалаах өрөмүөн үлэтин саҕалаабыта ыйыллыбыт болдьоҕунан баран иһэрин бэлиэтээтэ. Кини Дьокуускайдааҕы ГРЭС-2 иккис уочаратын тутуу бырайыактааһыныгар итиэннэ бэйэбит дойдубутугар оҥоһуллар тэриллэргэ көһөрүүгэ болҕомто уурулларыгар, тутуу үлэтин кыалларынан кылгас болдьоххо ыытары ситиһэргэ Бырабыыталыстыба бэрэссэдээтэлин бастакы солбуйааччы Дмитрий Садовниковка сорудах биэрбитин эттэ.
Айсен Николаев Мэҥэ Хаҥалас улууһугар оробуочай сырыытыгар улуус административнай киинигэр Аллараа Бэстээх бөһүөлэгэр «Култуура» национальнай бырайыагынан тутулла турар Култуура сайдыытын киинин эбийиэгин көрдө. Майа сэлиэнньэтигэр Кыайыы монуменыгар, Комсомольскай болуоссакка сырытта. Улуус баһылыга Дмитрий Тихонов уонна Майа сэлиэнньэтин баһылыга Алексей Неустроев соторутааҕыта Владивосток куоракка «Уһук Илиҥҥи эрэгийиэннэргэ куорат табыгастаах усулуобуйатын тэрийии» федеральнай бырагырааматын иккис куонкуруһугар Кыайыы монуменын саҥардан, тупсаран оҥорууга «Кыайыы Аартыга» бырайыагынан 50 мөл. солк. грант кыайыылааҕынан тахсыбыттарын кылгастык сырдаттылар. Ил Дархан салгыы Майа киинигэр турар Комсомольскай болуоссакка олохтоох көҕүлээһиннэри өйүүр бырагырааманан былырыын тутуллан үлэҕэ киллэриллибит «Майа сайына» бырайыагы көрдө.
Алена Докторова
