И.Г.Тимофеев аатынан Майатааҕы лиссиэй уонна «Хорообут» ХЭТ кыттыһан Хорообут нэһилиэгэр уолаттарга «Эр хоһуун» 10 күннээх үлэ лааҕырын тэрийдилэр. Лааҕыр иккис сылын үлэлиир. Манна 6-с кылаастан 9-с кылааска диэри 10 уол бэйэлэрин баҕа өттүлэринэн суруйтаран үлэлии-хамсыы кэлбиттэр, үгүстэр иккис сылларын сылдьаллар.
Лааҕырга Хорообут сылгыны иитэр хаһаайыстыбатыгар, Хатыҥ Күрүө 366 иэннээх бааһынаҕа күрүө тутан, күүс-көмө буолаллар. Максим Никитин, Арсен Яковлев, Никита Тимофеев, Эрхан Осипов, Арсен Иванов, Сеня Назаров, Саян Новиков, Павел Пивоваров, Аман Лазарев, Аскольд Шишигин туппут күрүөлэрэ олорор баазаларыттан номнуо көстүбэт сиргэ тиийбит. Күҥҥэ ортотунан 50 остоолбону туруораллар.
«Хорообут» хааччахтаммыт эппиэтинэстээх тэрилтэ 2012 сыллаахха тэриллэн сылгы, сүөһү иитиитинэн, саха боруодалаах сылгы төбөтүн элбэтиинэн дьарыктанар. Былырыын саха боруодалаах сылгыны үөскэтиигэ племенной собуот туругун ылары ситиспитэ. Салайааччынан Григорий Плотников буолар. Урукку бурдук ыһыллыбыт бааһына сирэ тас күрүөтэ сэргэхсийэн, сайынын ньирэйдэри мэччитэр, кыһынын сылгылары ыытар хааччах буолара былааннанар. Хаһаайыстыбаҕа сайынын от үлэтэ буолан, үлэһит илии тиийбэккэ, бу былаан өр сыл кыаллыбакка, олоххо киирбэккэ тохтоон турбут. Онон оҕолор маннык кэлэн үлэлээн, хаһаайыстыбаҕа улахан көмө-тирэх буолбуттар.
Иван Гаврильевич Тимофеев төрүт дойдута Хорообут, дойдутугар олус бэриниилээҕэ, ис сүрэҕиттэн таптыыра. Хаһаайыстыба үлэтэ-хамнаһа ыһыллыы-тоҕулуу кэмигэр сатарыйбакка салгыы барарыгар улахан өҥөлөөх киһи буолар. Партия райкомун 1 сэкирэтээринэн олорон 1980-1990 сылларга Хорообукка маһынан оҥоһуллубут шлюз-регуляторы тимир-бетон көрүҥҥэ көһөрүллэрин ситиспитэ. Билигин Хорообукка бөҕө-таҕа, алта тимир-бетон шлюз-регулятор баар буолан, кураан да дьылларга өлгөм үүнүүнү биэрэр.
Иван Гаврильевич Тимофеев аатын сүгэр лиссиэй үөрэнээччилэрэ кини үлэлээбит хаһаайыстыбатыгар бырааттыы сыһыаны олохтоон, уол оҕону тыа хаһаайыстыбатын үлэтигэр сыһыарар сыаллаах лааҕыр тэрийэллэр. Хорообут нэһилиэгин дьаһалтата, чуолаан баһылык Гаврил Бродников, “Хорообут” ХЭТ дириэктэрэ Григорий Плотников, лиссиэй дириэктэрэ Татьяна Попова, урбаанньыт Сергей Кривогорницын лааҕыр тэрилинэн хааччыллыытыгар күүс-көмө буолбуттар.
«Эр хоһуун» үлэ лааҕырын иккис сылын Хорообут күтүөтэ Павел Судико үлэлэтэр. Кини быйыл төһө да Дьокуускай куоракка атын үлэҕэ көстөр, былырыыҥҥы иитилээччилэрин, үөрэнээччилэрин көрдөһүүлэрин быһа гыммакка, оҕолор эрэллэрин түһэн биэрбэт санааттан босхо, хамнаһа суох үлэлииргэ сөбүлэһэн кэлбит: «Оҕолор лааҕырга сылдьыбыт күннэрин кыһыны быһа саныыллар, ахталлар. Манна үлэни кытта сынньалаҥы тэҥҥэ дьүөрэлиибит. Үлэ кэннэ үрэххэ сөтүөлээн, сибиэһэй салгыҥҥа көҥүл сүүрэн-көтөн, оонньоон, дэриэбинэ сибиэһэй үүт-эт аһын амтаһыйан, хамнас аахсан баралларыттан уолаттар олус астыналлар”. Түгэнинэн туһанан Павел Анатольевич оҕолор төрөппүттэригэр, лааҕыр тэриллэригэр күүс-көмө буолбут салайааччыларга истиҥ махталын тиэртэ.
Лааҕырга оҕолор күҥҥэ түөрт чаас үлэлииллэр. Бэйэлэрэ кэпсииллэринэн, быйыл лаппа уопутурбуттар. Былырыыҥҥыга тэҥнээтэххэ, икки төгүл ыраах сири күрүөлээбиттэр. Былырыын асчыт баар буолан, бэлэм астаммыт аска сылдьыбыт буоллахтарына, быйыл астарын бэйэлэрэ буһарынан аһаабыттар. Кыбартыыраҕа олорор уолаттарга, кутаа оттон күөс өрүнэллэрэ да умнуллубат өйдөбүл, үөрүйэх буолбут. «Плов кытта сатыыр буоллум ээ”,- диэн астына кэпсииллэр.
Үөрэнээччилэр сайыҥҥы үлэлэрин иһин хаһаайыстыбаны кытта дуогабардаһан арыынан, кыра харчынан хамнастаналлар. Ону үгүстэрэ күһүн үөрэх тээбиринэ ылынарга туттабыт диэн кэпсээтилэр.
Оҕолор итинник сайыҥҥы сынньалаҥнарын көхтөөх кэлэктиип үлэтигэр туһалаахтык атаарбыттар.
Елизавета Неустроева.
