Саха АССР үтүөлээх бырааһа, Мэҥэ Хаҥалас оройуонун бочуоттаах гражданина Николай Гаврильевич Кычкин доруобуйа харыстабылын тиһигэр олоҕун 51 сылын анаабыта – биэлсэртэн саҕалаан, оройуон кылаабынай бырааһыгар тиийэ үүммүтэ. 1981 сылтан 1994 сылга диэри үлэлиир кэмигэр тыа оройуоннарыгар биир бастакынан Майаҕа икки мэндиэмэннээх толору хааччыллыылах таас балыыһаны, “Суһал көмө” дьиэтин, массыыналар турар таас гарааһы туттарбыта, оҕо көрдөрөр балыыһатын таас дьиэҕэ көһөттөрөрү ситиспитэ. Анал үөрэхтээх быраастарынан хааччыллыыга үгүс сыратын уурбута, инникини өтө көрөн онколог быраас дуоһунаһын киллэрбитэ. Мэҥэ Хаҥаласка оччолорго биир бастакынан физиотерапия салаатын тэрийбитэ. Үгүс нэһилиэктэргэ ФАП дьиэлэрин туттарбыта, суох буоллахтарына — саҥаттан арыйтарбыта.
Николай Гаврильевич Кыычыкыннар эмчит династияларын аҕа баһылыга. Кэргэниниин, 38 сыл клиническэй лаборанынан үлэлээбит Екатерина Алексеевналыын быйыл бииргэ олорбуттарын 62 сылын бэлиэтээбиттэрэ.
Оҕолоро бары төрдүөн, ону тэҥэ, сиэннэрэ эмчит идэтин талбыттара. Уола Юрий Николаевич – үрдүк категориялаах уролог-эмчит, Саха Өрөспүүбүлүкэтин доруобуйа харыстабылын туйгуна. Үлэтин ыстааһа – 39 сыл. Улахан кыыһа Валентина Николаевна – Саха Өрөспүүбүлүкэтин доруобуйа харыстабылын туйгуна. Үрдүк категориялаах медсиэстэрэ, ыстааһа – 28 сыл. Арассыыйа Федерациятын Доруобуйа харыстабылын министиэристибэтин Бочуоттаах кыраамататынан наҕараадаламмыта. Орто кыыһа Анна Николаевна Иркутскайдааҕы медицинэ институтун бүтэриэҕиттэн, 32 сыл устата эҥкилэ суох стоматолог-бырааһынан үлэлиир. Кыра кыыһа Надежда Николаевна – үрдүк категориялаах рентгенолог-быраас. Үлэтин ыстааһа – 25 сыл. Медицинэ национальнай киинин уопсай рентгендиагностикатын отделениетын сэбиэдиссэйэ.
Сиэннэр эһэлэрин туйаҕын хатара сылдьаллар. Евгения Кычкина ХИФУ медицинскэй институтун үһүс кууруһун устудьуона. Иван Корякин Санкт- Петербурдааҕы медицинэ кэллиэһин бүтэрэн баран, билигин ХИФУ медицинскэй институтун стоматолог быраастары бэлэмниир факультет бэһис кууруһун устудьуона. Иннокентий Корякин – медицинэ национальнай киинигэр рентген бырааһынан, оттон кэргэнэ Светлана Дьокуускайдааҕы 3 №-дээх балыыһаҕа эндокринолог бырааһынан үлэлэрин саҕалаатылар. Лена Михайлова Амурдааҕы медицинскэй институт төрдүс кууруһун устудьуона. Коля Ефимов ХИФУ медицинскэй физика салаатыгар төрдүс кууруһугар ситиһиилээхтик үөрэнэ сылдьар.
Онон Кыычыкыннар медицинскэй династияларын уопсай ыстааһа 217 сыл — икки үйэттэн ордук.
Саха сиригэр Үлэ Сыла түмүктэнэн эрэр. Үлэҕэ бэриниилээх, үлэни өрө туппут Кыычыкыннар эмчит дьиэ кэргэннэригэр уруй-айхал буолуохтун!
Удьуор салҕанан истин, ситим быстыбатын!
Родион Кривогорницын.