Олох араас өрүтүттэн өрөһүлтэ буолар үрүҥ халааттаах аанньал – сиэстэрэ. Ыам ыйыгар мэдиссиинэ сиэстэрэтин Бүтүн Аан дойдутааҕы күнэ бэлиэтэнэр. Бу идэлээх күҥҥэ анаан Майа сэлиэнньэтигэр «Мэдиссиинэ бастыҥ сиэстэрэтэ» куонкурус ыытылынна. Күрэхтэһиигэ чэпчэкитэ суох үлэлээх биир идэлээхтэр талба талааннарын, идэни баһылааһын бастыҥ холобурун көрдөрдүлэр.
Куонкурус сиэстэрэлэр өрөгөй ырыаларынан аһылынна. Тэрээһин кыттыылаахтарын улуус кылаабынай сиэстэрэтэ Сардаана Китаева, тыраамба-ортопедия оройуоннар икки ардыларынааҕы салаатын сэбиэдиссэйэ Дмитрий Макаров эҕэрдэлээтилэр.
Куонкуруска 7 кыттааччы: Сардаана Катаева (гинекология салаата), Стелла Яковлева (сүрэх-тымыр ыарыыларын эмтиир салаа), Елена Романова (анестезиология, реаниматология салаата), Нарыйа Попова (Майатааҕы поликлиника), Александра Толстякова (Төҥүлүтээҕи быраас амбулаторията), Анна Васильева (суһал көмө салаата), Егор Саввин (сэллиги эмтиир диспансер) биэс түһүмэҕинэн күөн көрүстүлэр.
Бастакы түһүмэххэ куонкурус кыттыылаахтара «Мин идэм – мин киэн туттуум» диэн ааттаах 18-с үйэҕэ олорон ааспыт Флоренс Нантингейл кэминээҕи бириэмэнэн бэйэлэрин билиһиннэрдилэр. Сиэстэрэ Аан дойдутааҕы күнэ 1974 сыллаахтан Аан дойдуга ыарыһахтары уонна бааһырбыттары көрүүнү-харайыыны төрдүттэн уларыппыт Британия уопсастыбаннай диэйэтэлэ Флоренс Нантингейл төрөөбүт күнүгэр бэлиэтэнэр буолбута.
Иккис түһүмэххэ сиэстэрэлэр билиилэрин тургутар ыйытыыларга хоруйдаатылар. Талан ылбыт хартыыналарынан ханнык ыарыыга туох көмөнү оҥороллорун кэпсээтилэр.
Үһүс түһүмэх Дьиэ кэргэн, Оҕо саас сылларыгар ананар ырыа, үҥкүү толоруута буолла. Манна күрэхтэһээччи дьиэ кэргэнин кытта кытынна. Сиэстэрэлэри чугас дьоно өйөөн, эбээ-эһээ, күүстээх аҥардара, оҕолоро кытта кэлбиттэрэ күрэхтэһиини олус киэргэттэ.
Салгыы ийэ, аҕа, оҕо кыттар көрдөөх эстэпиэтэтэ саҕаланна. Оҕо сүүрэн тиийэн ыарыһахха итиини кээмэйдиир градуснигы илиитинэн туппакка эрэ угар, аҕа эми ньуоскаҕа тутан тиийэн иһэрдэр, ийэ бэрчээккэ кэтэ охсон, испирииһи бэлэмнээн, укуол туруорар.
«Сатабыллаах илиилэр» диэн ааттаах түмүктүүр түһүмэххэ кыттааччылар бэйэлэрэ илиилэринэн оҥоһуктарын көрдөрдүлэр, кэпсээтилэр.
Кыттааччылар бары да талба талааннаахтарын, идэлэрин толору баһылаабыттарын көрөн итэҕэйдибит, астынныбыт. Дьүүллүүр сүбэ быһаарыытынан «Мэдиссиинэ бастыҥ сиэстэрэтэ» куонкурус кыайыылааҕынан анестезиология, реаниматология салаатын кылаабынай сиэстэрэтэ Елена Романова ааттанна. Иккис миэстэни Төҥүлүтээҕи быраас амбулаториятын физио-эмтээһиҥҥэ сиэстэрэтэ Александра Толстякова ылла. Үһүс бочуоттаах миэстэ сэллиги эмтиир диспансер медбратыгар Егор Саввиҥҥа бэрилиннэ.
Хайа да ыарыһах эмтэнэн үтүөрэрэ мэдиссиинэ сиэстэрэ көмөтө суох кыаллыбат. Сиэстэрэлэр ыарыһах балыыһаҕа киириэҕиттэн үтүөрэн тахсыар диэри аттыгар бааллар. Бэл, үтүө тыл, эйэҕэс сыһыан ыарыыны кыайарга көмөлөһөр. Онон, түгэнинэн туһанан, үтүө санаалаах үрүҥ халааттаах аанньаллары – сиэстэрэлэри идэлээх күннэринэн эҕэрдэлиибит!
Елизавета Неустроева.
