Отчуоттуур бөлөх бу күн иккис аҥаарыгар Алтан нэһилиэгэр айаннаан тиийдэ. Баһылык Николай Матчитов бүгүн 50 сааһын туолбутунан Дмитрий Иванович эҕэрдэлээтэ итиэннэ бөлөххө кэлбит салайааччылары билиһиннэрэн туран, слайданан 2024 сыллаах үлэни-хамнаһы хайысхаларынан инники 2 сылга тэҥнэбиллэри аҕалан сырдатта.
Бу кэннэ нэһилиэнньэ көхтөөхтүк кыттан мунаарар ыйытыктарын биэрдилэр. Буойуна үлэтин, үп хантан, хайдах ааҕыллан кэлэрин, сүөһү төбөтүгэр бэриллэр көмө харчы быйыл хайдах буолуой, сир оҥоруутун, скважина, үүт тутар пуун, Бүтэйдээх суолун оҥоруутун туһунан, үөрэх үлэһиттэрин айанын төлөбүрэ тоҕо сыл бүтүүтэ төлөнөрүн, үрэҕи туоруур муоста мөлтөөбүтүн, социальнай үлэһит хас саастарыгар диэри саастаах дьону көрөрүй, улуустан анал байыаннай дьайыыга хас киһи барда, о.д.а. ыйытыктары биэрдилэр.
Сир боппуруоһун исписэлииһэ Иннокентий Попов, «Якутнацпродукт» ТХПК бэрэссэдээтэлэ Дмитрий Герасимов, үлэ бэтэрээннэрэ Дмитрий Белолюбскай көхтөөхтүк кыттан, булт, сип-хаабыл, трансформатор уларытыытыгар санааларын тиэртилэр. Педагогическай үлэ бэтэрээнэ Татьяна Стручкова нэһилиэк үүтүн былаанын 2 бааһынай хаһаайыстыба толорбутун, көмө харчыны, чааһынайтан, бааһынайтан тутулуга суох, сүөһү төбөтүгэр биэриэххэ уонна үүтү эмиэ ирдиэххэ диэн эттэ.
Кэтэх хаһаайыстыбатыгар 10 сүөһүлээх үлэ бэтэрээнэ Клавдия Федорова көмө харчыны сүөһү төбөтүгэр биэрбиттэрэ туһалааҕын, ол салҕанарыгар баҕарарын, гаас киирэн абыраабытын, быраас амбулаторията, ыһыахтыыр сир, саҥа култуура киинэ оҥоһуллан үлэҕэ киирбиттэриттэн үөрэрин улуус, өрөспүүбүлүкэ салалталарын үлэлэриттэн астынарын этэн махтанан туран, үлэни-хамнаһы үрдүктүк сыаналаата. Кини маннык отчуоттан сылаас тыын кэлэрин эттэ, нэһилиэккэ ыччат элбииригэр, оҕо-уруу эбиллэригэр баҕатын эдэрдэргэ тиэртэ.
Олохтоох дьаһалта исписэлииһэ Лена Романова сүөһү төбөтүгэр бэриллэр көмө харчыны ыанар ынах төһө үүтү биэрбитинэн бэриллэрэ хайата сөбүн үөрэтэн көрөн биэрэллэригэр тус санаатын эттэ.
Норуот дьокутаата, Ил Түмэн сир сыһыаннаһыыларыгар, айылҕаҕа уонна экологияҕа сис кэмитиэтин бэрэссэдээтэлэ Андрей Находкин “КлиКра сокуонун” дьонугар-сэргэтигэр быһааран, куттанар төрүөт суоҕун эттэ.
Ил Түмэн дьокутаата Захар Никитин саҥа култуура киинигэр колледж оҕолорун кэнсиэрдэтэ аҕалыам диэн олохтоохтору үөртэ. Каадыры бэлэмнээһиҥҥэ туһаайан улуус дьаһалтата тус сыаллаах бырагырааманан аҥардас култуура коллеһыгар түөрт оҕону үөрэттэрэр, каадыр боппуруоһугар, ыччаты олохсутууга бары үлэлиэхпитин наада диэтэ уонна кылгастык үлэтин-хамнаһын сырдатта. Бу кэннэ баһылык Николай Егорович нэһилиэнньэҕэ Захар Николаевич дьокутаат быһыытынан саҥа култуура дьиэтигэр элбэх кэпсэтиилэри ыытан дьоһун көмөлөрү оҥорбутун бэлиэтээн туран, махталын тиэртэ.
Олохтоохтор дьон-сэргэ туруктаах буоларын туһугар үлэ күүскэ барарын сыаналаатылар, дьаһалта үлэтин кэрэхсииллэрин эттилэр.
Отчуоту 56 киһи иһиттэ.
Марелла Баишева.
