Петр Тихонов,
Мэҥэ Хаҥалас улууһун, 3-с Мэлдьэхси нэһилиэгин Бочуоттаах олохтооҕо, Ил Дархан Олоҥхоҕо стипендиата:
— Дойдубут Бэрэсидьиэнэ Владимир Путин бүгүн, олунньу 29 күнүгэр 2 чаастан ордук кэмҥэ барбыт анал этиитин иһиттибит. Бастатан туран, Арассыыйа дьоно-сэргэтэ анал байыаннай эпэрээссийэни өйүүллэр диэн тоһоҕолоон бэлиэтээбитэ элбэхтик нэһилиэнньэ араас араҥатын кытта көрсөрүн, норуот санаатын истэрин туоһулуур. Тыа хаһаайыстыбатынан дьарыктанар үлэһиттэргэ махтанна. Арассыыйа экэниэмикэ өттүнэн кэлэр 2030 сылга Аан дойду 4 сайдыылаах судаарыстыбаларын ахсааныгар киирсиэ диэтэ. Ити этии элбэҕи этэр. Арассыыйаҕа демократия институтун салгыы сайыннарабыт, национальнай интэриэспитин, элбэх омуктаах дойду суверенитеппытын салгыы көмүскүүбүт диэтэ. Экология туризмын кииннээн тэрийиэххэ уонна үлэлэтиэххэ, мас олордуутун көҕүлээммит маһы кэрдииттэн олордуу иэнэ улаатта диэтэ. Ыраас иһэр уу, ыраас салгын уонна тулалыыр эйгэни харыстааһын, каадыр туһунан бырагыраамалары эппитин кэрэхсээтим.
Иитэр үлэҕэ оскуола, уһуйаан уонна да атын үөрэх тэрилтэлэрин туһааннаах тутууларын, өрөмүөннэрин салгыы оҥоробут, оскуолалары, уопсастыбаннаһы уопсастыбаннай тырааныспарынан хааччыйаммыт элбэх оптуобустары, троллейбустары эбии ылыахпыт, эдэр ыалларга олорор дьиэни тутууга көмөнү салгыы оҥоруохпут диэтэ. “Дьиэ кэргэн” диэн анал бырагыраама олохтонорун, элбэх оҕолоохторго, кыаммат араҥаҕа социальнай өттүнэн көмөҕө үбү-харчыны эттэ, олох-дьаһах хомунаалынай хаһаайыстыбаҕа ордук тэйиччи сытар сирдэри, нэһилиэнньэлээх пууннары хааччыйыыга көмө, уопсай бөҕү-саҕы харайыыга, уматыыга, суох оҥорууга бырагыраама баарын, нолуок систиэмэтин саҥардыыга эрэгийиэннэргэ бэйэлэрэ дьаһаналларыгар кыах биэрэн көрүҥнэрин эбиэххэ диэн этиилэрин биһирээтим. Аҕа дойду авиациятын, аэродромнары тутуутун, ону таһынан эрэгийиэннэр ыраах сытар нэһилиэнньэлээх пууннарын хабыы туһунан эппитэ хамсааһыны таһаарыан сөп диэн сэргээтим.
Түмүккэ, В.В.Путин анал этиитигэр сүнньүнэн 2030 сылга диэри, о.э. 6 сыллаах үлэ бырагырааматын эттэ диэн ылынным.