Бүгүн Ийэлэр Арассыыйатааҕы күннэрин көрсө, өрөспүүбүлүкэ Бырабыыталыстыбатын дьиэтигэр элбэх оҕолоох, холобур буолар ийэлэри «Ийэҕэ Албан аат» III истиэпэннээх бэлиэлэринэн үөрүүлээх быһыыга наҕараадалаатылар.
Биһиги улууспутуттан Майа сэлиэнньэтиттэн сэттэ оҕо ийэтэ Августина Николаевна Беляеваҕа уонна аҕыс оҕолоох Парасковья Васильевна Ефимоваҕа бу үрдүк наҕараада ананна.
Үөрүүлээх тэрээһиҥҥэ бэлиэлэри Бырабыыталыстыба бэрэссэдээтэлэ Кирилл Бычков туттарда. Улууспут дьонун-сэргэтин аатыттан улуус баһылыгын бастакы солбуйааччы Василий Михайлов эҕэрдэлээтэ, ону тэҥэ улуустааҕы социальнай бэлиитикэ управлениетын салайааччы Октябрина Кулешова, Майа дьаһалтатын социальнай боппуруостарга сүрүн исписэлииһэ Виктория Федорова кыттыыны ыллылар. Үрдүк наҕарааданы ылбыт элбэх оҕолоох дьиэ кэргэннэр тапталлаах ийэлэрин Августина Николаевнаны уонна Парсковья Васильевнаны өссө төгүл итиитик-истиҥник эҕэрдэлиибит.
Ийэ-аҕа буолуу, оҕо төрөөһүнэ, дьэ кэргэн бигэ туруктаах буолуута инники күөҥҥэ тутуллаллар. Үтүө холобур буолар ийэлэрбитигэр оҕону иитиигэ, дьиэ кэргэн сыаннастарын сайыннарыыга суолталаах кылааккыт, уопсастыбаннай олоххо көхтөөх кыттыыгыт иһин махтанабыт. Кэнчээри ыччаккыт билиилээх-көрүүлээх, төрөөбүт дойдуларын ытыктыыр, таптыыр дьоһун дьон буола иитиллэн тахсыахтара диэн эрэнэбит.
Баҕарабыт чэгиэн-чэбдик буолууну, дьоллоох олоҕу, ситиһиилэри. Алаһа дьиэҕитигэр үөрүү-көтүү уйаланнын, ил-эйэ эҥээрдэстин, уйгу-быйаҥ үксээтин, тула өттүгүтүгэр чөл олох төлкөлөннүн, аламай күн сандаардын!
Мэҥэ Хаҥалас улууһун дьаһалтатын пресс-сулууспата.
