Дьахталларын аан дойдутааҕы күннэрин көрсө Саха сирин элбэх оҕолоох ийэлэригэр судаарыстыбаннай наҕараадалары туттардылар. “Күн күбэй ийэ” уордьан араас истиэпэнин өрөспүүбүлүкэ үрдүнэн 31 ийэ ылла. Мэҥэ Хаҥалас улууһуттан бу үрдүк наҕарааданан икки ийэ бэлиэтэннэ.
Майа олохтооҕо, Евдокия Заровняева кэргэннээх, 8 оҕо күн-күбэй ийэтэ. Орто анал үөрэхтээх, оҕо спортивнай оскуолатын үлэһитэ, парикмахер идэлээх, билигин 8 ыйдаах кыра оҕотун көрөн олорор. Улаханнара Арсений 17 саастаах, тыа хаһаайыстыбатын техникумун устудьуона, 6 оҕо оскуолаҕа үөрэнэллэр. Евдокия Родионовна улахан дьиэ кэргэн түбүктээх үлэтиттэн быыс булан оҕолорун үөрэхтэригэр көмөлөһөр, хонтуруоллуур. Оҕолор үөрэхтэригэр үчүгэйдэр, уопсастыба олоҕор көхтөөхтөр, успуорка оскуолаларын, улуустарын, өрөспүүбүлүкэ чиэһин көмүскээн ситиһиилээхтик кытталлар. Евдокия Родионовна оскуолаҕа бастыҥ төрөппүттэр ахсааннарыгар сылдьар, сэлиэнньэҕэ физкултуура уонна успуорт сайдыытыгар кырата суох кылаатын киллэрсибит киһинэн сыаналанар. Бэйэтэ сэлиэнньэҕэ биир биллэр-көстөр уопсастыбанньык, олус сэмэй, үтүө майгылаах киһи буоларын бэлиэтиибит. Кини улууһун “Эркээйи” хаһыатыгар волонтерунан үһүс сылын үтүө суобастаахтык үлэлиир. Манна кинини билигин кэргэнэ, оҕо спортивнай оскуолатын үлэһитэ Савва Павлов үлэтин быыһыгар солбуйан, хаһыаты тахсыбыт күнүгэр тыыл бэтэрээннэригэр дьиэлэригэр илдьэн биэрэр. Евдокия Заровняева “Күн күбэй ийэ” уордьан иккис истиэпэнинэн наҕараадаланна уонна 200 тыһыынча солкуобай харчылаах Туоһу суругунан бириэмийэлэннэ. Санатар буоллахха, кини икки сыллааҕыта 3-с истиэпэннээх уордьанынан наҕараадаламмыта.
Иккис ийэ Евдокия Сидорова кэргэннээх, Хара нэһилиэгин олохтооҕо. Кини биология учууталынан үлэлээбитэ, билигин уйулҕа идэлээх үлэһит. Нэһилиэк көхтөөх уопсастыбанньыга, социальнай бырайыактарынан дьарыктанар, “Бары бииргэ” хамсааһын волонтера, “Өбүгэ ситимэ” норуот эмчиттэрин ассоциациятын чилиэнэ. Аҕатынан Үөһээ Бүлүү, ийэтинэн Кэбээйи, Дьокуускай куоракка улааппыт. 7 оҕолоох ийэ Мэҥэ Хаҥалас улууһугар, Хара нэһилиэгэр олохсуйбутуттан наһаа үөрэр, дьонугар-сэргэтигэр махтанар. Кэргэнэ Гаврил Александрович Сидоров баһаарынай чаас үлэһитэ, салгын саатынан ытыыга призер, өрөспүүбүлүкэ чөмпүйүөнэ, «Манчаары оонньууларын» рекордсмена.
Евдокия Сидорова “Күн күбэй ийэ” уордьан үһүс истиэпэнинэн наҕараадаланна уонна 100 тыһыынча солкуобай харчылаах Туоһу суругунан бириэмийэлэннэ.
Киһиэхэ саамай күндүтэ, сүрүн баайа – оҕото буолар. Оҕо – дьолбут, олохпутун салҕааччыбыт. Элбэх оҕолоох ийэлэри үрдүк наҕараадаларынан эҕэрдэлиибит!
Марелла Баишева.
