Өйөбүл, сылаас сыһыан умнуллубат түгэннэрин бэлэхтиэҕиҥ

Аҕам саастаах дьон кыһалҕаларыгар, кинилэр олохторун хаачыстыбатын тупсарыыга уопсастыбаннас болҕомтотун тардар сыалтан 1991 сылтан саҕалаан сыл аайы алтынньы 1 күнүгэр Аҕам саастаах дьон норуоттар икки ардыларынааҕы күннэрэ бэлиэтэнэр.    

Бу күнтэн саҕалаан үгэс быһыытынан сылын аайы Аҕам саастаахтар дэкээдэлэрэ ыытыллар. Майа сэлиэнньэтигэр дэкээдэ иитинэн “Айылҕа битэмиинэ” аахсыйа, Кыайыы буойаһыгар экскурсия, о.д.а. араас тэрээһиннэр ыытыллан кэллилэр. Олохтоох дьаһалта кэлэктиибэ тыыл бэтэрээннэригэр күһүҥҥү оҕуруот аһынан (хаппыыста, моркуоп, сүбүөкүлэ) бэлэх оҥорон күндүлээтэ.

Ахсынньы 3 күнүгэр Аҕам саастаах дьон дэкээдэтинэн Арассыыйаҕа педагог уонна настаабынньык, өрөспүүбүлүкэҕэ Үлэ, улууска тыа хаһаайыстыбатын сылларыгар аналлаах тэрээһин буолар. Онно киин нэһилиэктэр (Майа, Хара, Чүүйэ, Бөкө, Лоомтука) бэтэрээннэрин уус-уран талааннарын көрүү бэстибээлэ ыытыллар.

Үлэ уонна социальнай сайдыы министиэристибэтин көҕүлээһининэн улуус, нэһилиэк, тэрилтэ аайы аҕам саастаах дьоммутугар болҕомтобутун уонна үтүө санаабытын аныыр соруктаах «Сылаас күһүн» социальнай аахсыйа тэрийэн, ытык дьоммутугар өйөбүл, үөрүү, сылаас сыһыан умнуллубат түгэннэрин бэлэхтииргитигэр ыҥыраллар.