Ааспыт өрөбүллэргэ СӨ үөрэҕириитин туйгуна, СӨ физкултуураҕа уонна успуорка туйгуна, волейбол успуорлугар биллэр тириэньэр, үрдүк категориялаах физкултуура учуутала, олоҕун успуорка анаабыт Эдуард Яковлев сырдык кэриэһигэр алтыс төгүлүн уолаттарга волейболга аһаҕас күрэхтэһии буолан ааста.
Турнирга 11 хамаанда Бэдьимэттэн икки, улуус сүүмэрдэммит, 2009‒2010, 2011‒2012 с.т. оҕолор, Чыамайыкы, “Хоту”, Болтоҥо (Чурапчы), Сулҕаччы (Амма), Томтор, Булгунньахтаах (Арҕаа Хаҥалас) кытынна. Күрэхтэһии аһыллыытыгар улуус успуорка управлениетын начаалынньыга Алексей Попов ыалдьыттаата. Олохтоох урбаанньыт Ольга Сергучева улуус хамаандатыгар пуорма ылалларыгар успуонсардаабыта, киниэхэ улуустан Махтал сурук туттарылынна.
Быйылгы турнир “Бастыҥ охсооччута” Артем Готовцевка байыаннай дьайыы кыттыылааҕын сырдык кэриэһигэр, уруккута волейболист уол Петр Захаров аатынан анал бирииһи ийэтэ Анна Захарова туттарда. ”Бастыҥ көмүскээччи” Иван Аржаков Бэдьимэ мэхэньисээтэрдэрин анал бириистэрин тутта. “Кэскиллээх оонньооччу” Марат Попов мас тардыһыытыгар СӨ успуорка маастара Наталья Старкова бирииһин тутта. “Бастыҥ көмүскээччи” Айтан Кириллиҥҥэ, “Бастыҥ туруорааччы” Айсен Христофоровка Эдуард Яковлев иитиллээччилэрин, уолаттар хамаандаларын анал бириистэрин туруордулар. Турнир “Бастыҥ оонньооччутунан” Сергей Бетчинов ааттанан Эдуард Яковлев дьиэ кэргэнин “Спортмастер” маҕаһыын 10 тыһыынчалаах сэртипикээтин үөрүүлээх быһыыга-майгыга тутта.
Үөрүөх иһин, Бэдьимэ бастакы, иккис хамаандаларын уолаттара оонньуур таһымнара үрдээн, тупсан иһэллэрин олохтоохтор бэлиэтииллэр. Турнир анал бириистэрин Борис Санниковка насоснай станция, Виталий Неустроевка быраас Никифор Слепцов, Артем Игнатьевка байыаннай дьайыыга сылдьар волейболист уолаттар ааттарыттан ийэлэрэ Саргылана Андреева туттардылар. Бэдьимэ бэтэрээн дьахталларын хамаандатын бирииһэ Айсен Тимофеевка, Бэдьимэ таксистарын анал бирииһин Виталий Афанасьев, волейболист Иван Емельянов сырдык кэриэһин санаан, дьоно анал бирииһи Дуолан Калитиҥҥа, Артем Готовцевка, оттон Эдуард Яковлев кылааһын оҕолоро “Бастыҥ саҕалааччы” анал бирииһи Радислав Стручковка биэрдилэр. Күрэхтэһии кылаабынай судьуйата, оҕолорго волейболга тириэньэрэ “Волейболу көҕүлээһин иһин” бирииһи Эдуард Яковлев аймахтара, иитиллээччилэрэ махтанан туран туттардылар.
Икки күннээх күрэхтэһии түмүгүнэн бастакы миэстэни улуус сүүмэрдэммит, иккиһи Бэдьимэ-1, үсүһү Сулҕаччы хамаандалара ыланнар сыаналаах бириистэри, куубактары туттулар, мэтээллэри кэттилэр. Олохтоох дьаһалта, Н.Д.Неустроев аатынан оскуола-саад кэлэктиибэ, ОДьКХ харчынан успуонсардаатылар. Түмүккэ Эдуард Яковлев кэргэнэ Марина Дмитриевна спортсменнарга, тэрийээччилэргэ, ыалдьааччыларга, итии аһынан хааччыйбыт оскуола кэлэктиибигэр, ас атыылаабыт 11 кылаастарга (сал. М.И.Плюк), олохтоох кыргыттарга махтанна уонна нэһилиэк баһылыгар “Маассабай успуорду бастыҥ тэрийээччи” анал бэлиэни, нэһилиэк, оскуола бибилэтиэкэлэригэр “Кэлбитим орто дойдуга” саҥа кинигэтин бэлэхтээтэ.
Нэһилиэк баһылыга Петр Андросов бары тэрээһиҥҥэ кыттыбыттарга, спортсменнарга, олохтоохторго, успуонсардаабыттарга барҕа махтал тылларын тиэртэ.
Марина Яковлева, бэтэрээн учуутал. Бэдьимэ
