Дойдуга Дьиэ кэргэн, өрөспүүбүлүкэбитигэр Оҕо саас, улууспутугар Тыа хаһаайыстыбатын иккис сыллара биллэриллэн үлэ-хамнас күүскэ барар.
Тараҕай нэһилиэгин эдэр ыала Саргылана Николаевна, Прокопий Викторович Спиридоновтар түөрт оҕолоохтор. Улаханнара Мичил Спиридонов Р.А.Бурнашов аатынан Табаҕа орто оскуолатын боруогун быйыл атыллаабыт. Айта уонна Чэмэлиинэ уһуйаан иитиллээччилэрэ уонна кыралара 1,5 саастаах Арылханы ийэлэрэ көрөн олорор.
Ыал аҕата Прокопий Викторович Өлүөхүмэ улууһун 1-кы Нөөрүктээйи нэһилиэгиттэн төрүттээх. Бииргэ төрөөбүт төрдүөлэр. Прокопий 6 сааһыгар тулаайах хаалан эбэлээх эһэтигэр иитиллибит.
2015 сыллаахха Аллараа Бэстээххэ Прокопий тырааныспар техникумугар богуоннары көрөр-истэр, өрөмүөннүүр, Саргылаана куруус кэлиитин-барыытын хонтуруоллуур-учуоттуур идэлэргэ үөрэнэн бүтэрбиттэр. Онно үөрэнэ сылдьан билсэн, эдэр дьон 2016 сыллаахха Спиридоновтар диэн ыал буолбуттар. Онтон Прокопий Алдан таһыгар Кураанах диэн ыстаансыйаҕа баран икки сыл дьуһуурунайынан үлэлээбит. Бу сылдьан дьиэ кэргэнин кытта бииргэ буолаары Бэстээҕэр төттөрү кэлэн араас үлэҕэ үлэлиир.
2024 с. тохсунньуга Саргылана аҕата, К.К.Байкалов аатынан сопхуоска, кэлин олох-дьаһах хомунаалынай хаһаайыстыбатыгар тырахтарыыһынан тахсыылаахтык үлэлээбит үлэ бэтэрээнэ Николай Николаевич Зыков эмискэ ыалдьан олохтон барар. Эдэр ыал ийэлэригэр көмөлөһөөрү Саргылана төрөөбүт-үөскээбит, оҕо сааһа ааспыт Табаҕатыгар көһөн кэлбиттэр. Билигин ийэлэрин Татьяна Иннокентьевна Зыкова дьиэтигэр олорон аҕаларыттан хаалбыт хаһаайыстыбатын сүөһүлэрин көрөллөр. Эдэр дьон сылын аайы окко дьонноругар кэлэн көмөлөһө сылдьыбыт буоланнар сүөһү үлэтигэр сыстаҕастар. Отордообут Өтөҕө алаастарыгар быйыл бэйэлэрэ оттоон түөрт улахан кэбиһии оттоохтор. Ону таһынан Эбэлэрин сыһыытыгар оттоон эбиммиттэр. Онон сыл тахсар оппутун буллубут диэн Саргылана этэр.
Саргылана, Прокопий Спиридоновтар 3 ынаҕы ыан оҕолорун бэйэ үрүҥ аһынан: күөрчэҕинэн, сүөгэйинэн, суоратынан, арыынан аһатан үөрэллэр. 3 борооскулаахтарын оҕолоро көрсөллөр, уулаталлар, мэччитэллэр. Төрдүс ынахтара кытараан байтаһын буолан, мантан күһүн идэһэ боппуруоһугар турар курдук. 2 биэлээхтэр, 10 кууруссаны иитэллэр. Прокопий ыалларга тыраахтарынан туттар ууну кутар.
Спиридоновтар Табаҕаҕа маҥнай кэллэхтэрин утаа аҕаларын сылын толорон баран Аллараа Бэстээххэ төннөр былааннаах эбит буоллахтарына, бэйэ аһынан-үөлүнэн хааччынар үчүгэйин билэн, санаалара уларыйбыт. Саргылана инникитин бэйэтин аатыгар көмө харчыга (субсидия) киирсэн кэтэх хаһаайыстыбатын кэҥэтэр баҕалаах. Эдэр ыал хотоннорун саҥардан, сүөһүлэрин, сылгыларын сыыйа элбэтэр, саҥа тиэхиньикэ ылынар былааннаахтар. Эдэр ийэ билиҥҥи кэмҥэ тыа сиригэр олорор дьоҥҥо сүөһү иитиитэ барыстаах салаа курдук көрөр. Билигин оҕолоро борбуйдарын көтөҕөн сүһүөхтэригэр туруохтарыгар диэри дьоннорун дьиэтин өрөмүөннээн олорор, салгыы сир ылан саҥа дьиэ туттар баҕа санааламмыттар.
Саргылана бииргэ төрөөбүт үс кыыстан кыралара буолар. Улахан эдьиийэ Дария Яновна Мирнэйгэ, кыра эдьиийэ Ньургуйаана Николаевна Аллараа Бэстээххэ ыал буолан олороллор. Ийэлэрэ Татьяна Иннокентьевна орто кыыһыгар оҕо көрсөн Бэстээххэ олорор.
Саргылана оҕо эрдэҕиттэн оҕуруо анньарын, кинигэ ааҕарын, ордук омук суруйааччыларын, фантастиканы ааҕарын сөбүлүүр. Оскуолаҕа үөрэнэр сылларыгар Табаҕатааҕы оҕо ускуустубатын театральнай отделениетыгар Маргарита Белолюбскаяҕа дьарыктаммытын киэн тутта ахтар, билигин улахан уола Мичил тыйаатыр устуудьуйатыгар үөрэнэ киирбит.
“Улахаттарым туһа дьоно, кыраларын бэркэ көрсөллөр, аһаталлар-сиэтэллэр. Дьиэ кэргэнинэн сир аһыгар кыралаан сырыттыбыт, хаптаҕас, тэллэй, отон хаһаанныбыт”, ‒ диир.
Саргылана, Прокопий Спиридоновтар оҕолорун иитиитигэр болҕомто ууралларын кэрэхсии иһиттим. Кинилэр оҕолоругар төлөпүөнү туттарбаттар, күөх экраны көрөллөрүгэр чопчу бириэмэнэн көҥүллүүллэр. Ыал аҕата Прокопий улахан уолун Мичили бэйэтин сатабылларыгар уһуйан илдьэ сылдьан көмөлөһүннэрэр. Саргылана кыргыттарын дьиэ-уот бүппэт түбүктээх үлэтигэр сыһыаран иитэр. Кыргыттар иһити сууйаллар, дьиэни быыллыыллар, оҕо көрсөллөр.
Улууспутугар тыа хаһаайыстыбатынан дьарыктаныан баҕарар эдэр дьон бааллара олус үөрдэр. Ыччакка, үүнэр көлүөнэҕэ үтүө холобур буолар Спиридоновтар дьиэ кэргэн кэтэх хаһаайыстыбаларын сайыннарар ыллыктаах санаалара олоххо киирэригэр баҕарыллар.
Марелла Баишева.
