Бу күннэргэ, ахсынньы 12‒13 күннэригэр, Москва куоракка Бүтүн Арассыыйатааҕы пиэрмэрдэр ассоциацияларын (АККОР) иһинэн «Молодые фермеры ‒ опора села» ыччат пуорума буолан ааста.
Балыктаахтан эдэр пиэрмэр Ньургун Габышев тиийэн «Популяризация АККОР в информационном пространстве» дакылаатынан кытынна, билиҥҥи кэмҥэ тыа сиригэр ыччат олохсуйуутугар бэйэтин тус санааларын тиэртэ.
Пуорумҥа дойдубут 35 эрэгийиэниттэн эдэр пиэрмэрдэр «Биир ньыгыл Арассыыйа» фракция өйөөһүнүнэн мустан, тыа сирин сайдыытыгар санааларын үллэстэллэр, араас боппуруостарга сүбэ-ама ылаллар. Көрсүһүүгэ Судаарыстыбаннай Дуума бэрэссэдээтэлин солбуйааччы Алексей Гордеев, аграрнай боппуруостарга бэрэссэдээтэли бастакы солбуйааччы, АККОР бэрэсидьиэнэ Владимир Плотников уонна «Россельхозбаан» бырабылыанньатын бэрэссэдээтэлин солбуйааччы Денис Константинов кыттыыны ыллылар. Саха сириттэн Ил Түмэн дьокутаата Эдгар Константинов итиэннэ Арыйан Винокуров буолан сырыттылар.
Ньургун Владимирович Балыктаах орто оскуолатын, онтон 2014 с. ДьГТХА бэтэринээр идэлээх бүтэрбитэ. Үөрэнэр сылларыттан үөрэҕин научнай өттүнэн чинчийиини кытта ыкса ситимнээхтик сыһыаран саҕалаабыта. Дойдутугар тахсан 2014 сылтан билиҥҥэ диэри хаһаайвстыба тэринэн үлэлиир.
2017 сылтан нэһилиэк дьокутаатынан талыллыбыта. 2023 сылтан Мэҥэ Хаҥалас улууһун пиэрмэрдэрин ассоциациятын АККОР бэрэссэдээтэлинэн талыллыбыта. Быйылгыттан Саха Өрөспүүбүлүкэтин Ыччат Бырабыыталыстыбатын чилиэнэ буолар. Габышевтар дьиэ кэргэн уол оҕолоохтор. Кэргэнэ Яна Ильинична орто оскуолаҕа биология, химия биридимиэттэрин үөрэтэр. Уоллара Эрсан 8 кылааска үчүгэйдик үөрэнэр. Аҕатыгар, эһэтигэр Владимир Николаевичка кыра эрдэҕиттэн көмө буолан сүөһүгэ-сылгыга сыстаҕас. Габышевтар бөһүөлэккэ ыытыллар бары тэрээһиннэргэ актыыбынайдык кытталлар.
Мария Захарова
