Эдэр ийэ хантараак көмөтүнэн таҥас сууйтарар өҥөнү оҥорор

Өрөспүүбүлүкэҕэ үлэтэ суох, тиийинэн олоруу алын кээмэйиттэн кыра дохуоттаах дьиэ кэргэннэргэ, ыарахан балаһыанньаҕа түбэспит дьоҥҥо көмөлөһөр сыаллаах социальнай хантараак нөҥүө судаарыстыба өйөбүлэ 2019 сылтан киирбитэ.

Бу өйөбүл үлэни көрдөнүүгэ, бэйэ дьыалатын арыныыга, сайыннарыыга, чааһынай хаһаайыстыбаны тэриниигэ бэриллэр. Тыа сиригэр, үлэ суох сиригэр бу маннык көмө көдьүүһэ  улахан. Үгүстэр урбаанньыт, бэйэ дьарыктаах буоланнар, олорор нэһилиэктэрин сайыннараллар, оҥорон таһаарыыны тэрийэллэр, үүнээйини олордоллор, сүөһүнү-сылгыны да көрөллөр.

Урбаанньыт, эдэр ийэ Валерия Фомина социальнай хантараагы туһанан Аллараа Бэстээххэ таҥаһы сууйар өҥөнү оҥорор. Валерия идэтинэн оҕо анестезиолог-реаниматолог бырааһа, Томскай куоракка Сибиирдээҕи судаарыстыбаннай медицинскэй университеты бүтэрбит. Дьиэҕэ олорон «Аллараа Бэстээххэ таҥас сууйарынан ким да дьарыктаммат эбит, арай, бу өҥөнү арыйдахпына, дьон сэҥээриэ этэ» диэн урбаанньыт буоларга санаммыт.

Бастаан саҕалыырыгар сөптөөх дьиэ-уот көрдөммүт. Тыа сиригэр элбэх таҥаһы сууйарга саамай улахан кыһалҕа – уу кэмчитэ буолар. Аптамаат массыынанан сууйтарарга элбэх уу наада, аны туттуллубут ууну сиэптиктэн төттөрү оботторуу эмиэ туспа харчыны эрэйэр. Ол иһин уулаах-хаардаах, толору хааччыллыылаах «Лион» атыы-офис киинин иккис этээһин уларсыбыт. Онтон тута туттар тэриллэри көрдөнөн барбыт. Социальнай хантараакка кыттан, 500 тыһыынча суумалаах көмө харчы ылан, таҥас сууйар массыыналары атыыласпыт. Киһи бэйэтэ кэлэн бэрт удамыр сыанаҕа таҥаһын сууйтарарыгар анаан туспа массыына туруорбут. Эбии түүлээҕи, түүлээх саҕынньахтары ыраастыыр химчистка сакаастаабыт. Оннук өҥөнү билиҥҥитэ аҕыйах сиргэ оҥороллор. Туһанар тэриллэрин барытын, үйэлээх буоллун диэн, анал оҥорон таһаарар тэрилтэлэриттэн ылан, ый курдук айаннаан кэлэллэрин күүппүт.

Сууйтарар өҥөнөн мас дьиэҕэ олорооччулар, анал таҥас кэтэр үлэһиттэр, дьону хоннорор гостиницалар, ону тэҥэ кэтэх хаһаайыстыбалаах үлэһиттэр туһаналлар. Валерия таҥас сууйар сыаҕар биир үлэһиттээх. Сууйарга туттар бородууксуйатын Таилантан, Кореяттан, Кытайтан сакаастаан ылар эбит. Хаһаайка быраас идэлээх буолан, барытын үөрэтэн, санитарнай нуормалары тутуһан, ханнык таҥаска хайдах сууйар сириэстибэ барсарын чопчу билэрэ олус көмөлөспүт.

«Социальнай хантараак чуолкай былааннаах, хайа диэки хамсанарын чопчу быһаарыммыт, хайдах сайдарын өйдөөбүт киһиэхэ бастакы хардыытыгар улахан көмө буолар. Билигин биисинэһим үчүгэйдик бара турар. Дьон туһанар, махтанар, киһи бөҕө сылдьар», – диэн эдэр урбаанньыт кэпсээтэ.

Валерия Симоновна саҕалаабыт дьыалата кэҥии турдун, инникитин да элбэх ситиһии, кыайыы тосхойдун. Эдэр ийэ күүстээх баҕа санаатын төһө да бастаан утаа сорох дьон соччо өйдөөбөтөҕүн үрдүнэн, олоххо киллэрэн, дьон олоҕун чэпчэтэ сылдьарыттан киэн тутуннум.

 

Елизавета Неустроева.