А.В.Чугунов аатынан Мэлдьэхси орто оскуолатыгар сэтинньи 15 күнүгэр үөрүүлээх, ураты суолталаах күн буолан ааспыта.
Турция курдук ыраах сиртэн, аан дойду дуобакка чөмпүйэнээтиттэн үрдүк ситиһиилээх кэлбит 11 кылаас үөрэнээччитин Прокопий Говоровы үөрэнэр оскуолатын оҕолоро, үлэһиттэрэ үөрэн-көтөн, долгуйан ытыс тыаһынан көрүстүбүт.
Прокопий быйыл сайын атырдьах ыйыгар Арассыыйа успуордун маастарын, сэтинньигэ İDF аан дойдутааҕы ассоциациятын маастарын ааттарын сүкпүтэ. Итини таһынан Турция сиригэр Доганай куоракка 64 харахтаах дуобакка 17‒20 саастаах уолаттарга аан дойдуга бастыыр иһин күрэхтэһиигэ түргэн бырагыраамаҕа боруонса мэтээли ылла, иккитэ үһүс миэстэлэри кытаанах, олус тыҥааһыннаах киирсиилэргэ ситиспитэ. Проня кыра сааһыттан дуобакка утумнаахтык дьарыктанан, араас дойдуларга курэхтэһэн, маастарыстыбатын сылтан сыл үрдэтэн маннык үрдүк ситиһиилэргэ кэлбитигэр, биллэн турар, кини тириэньэрэ – Саха Өрөспүүблүкэтин үтүөлээх тириэньэрэ Василий Васильевич Куприянов уонна Проня дьиэ кэргэнэ, ийэтэ Мария Дмитрьевна сүҥкэн оруоллаахтар.
Биир дойдулаахтара эдэр дуобатччыт Прокопий үрдүк ситиһиитинэн киэн туттабыт. Итиэннэ өссө да үрдүктэн үрдүк чыпчааллары дабайан иһэригэр үтүө баҕабытын тиэрдэбит.
Арылхан Сокольников, Мэлдьэхси орто оскуолатын 8 кылааһын үөрэнээччитэ.
«Үктэл» пресс-киин
