Дьоруой Ф.К.Попов аатынан урукку сопхуос нэһилиэктэрэ билигин даҕаны ситимнэрин быспаттар. Бу күннэргэ үгэс быһыытынан ыытар тэрээһиннэрин – «Эн, Хомсомуол – мин дьолум» диэн холбоһуктаах ыччат хамсааһынын 105 сылыгар аналлаах сынньалаҥ киэһэтин үһүс сылын бииргэ бэлиэтээтилэр.
1-кы Баатара нэһилиэгэр Төхтүртэн, Сыымахтан, Мэлдьэхситтэн, Хорообуттан уонна олохтоохтор, бэдьимэлэр, түмсэн, урукку кэм ырыаларын, үҥкүүлэрин тардан кэбистилэр, агитбиригээдэнэн оччотооҕу олох сүрүн кэрдиис кэмнэрин санаттылар, сорохтор Майаҕа райкомолга кэлэн хомсомуолга хайдах киирбиттэрин бу баардыы сценкаҕа оонньоон көрдөрдүлэр.
Бу иннинэ култуура үлэһиттэрин тэрийиитинэн агитбиригээдэ кэнсиэрдэрин нэһилиэктэри кэрийэ сылдьан көрдөрбүттэрэ. Онон бу түмүк тэрээһини Бэдьимэ олохтоохторо сааланы толору мустан астына-дуоһуйа көрдүлэр, эрчимнээх эдэр саастарын ахтан-санаан ыллылар.
