Ахсынньы 18 күнүгэр Хорообуттан биир улахан үлэ түмүктэммит чааһыгар ыҥырыллан элбэх хоһуун тырахтарыыстары илдьэ Дьаҥхаадыга сырыттыбыт.
Биһигини кытта ол эбэтэр ыҥырыыны быһа гыммакка,үөрүүнү үллэстэ,дьон үлэтигэр сыанабыллаахтык сыһыаннаһыы. Тырахтарыыстарбыт Гаврил Гаврильевич Семенов, Иван Васильевич Скрябин, Василий Васильевич Жирков, Петр Иннокентьевич Ильин, Николай Петрович Птицын, Алексей Николаевич Герасимов, сопхуос салайааччыларыттан биирдэстэрэ Агафий Герасимович Иванов буолан сырыттыбыт.
Үөрүүлээх чааска биһигиттэн өр кэмҥэ үлэлээбит «Кыһыл сулус» сопхуос дириэктэрэ Александр Михайлович Андреевка тыл бэрилиннэ. Кылгастык үлэ-хамнас туһунан кэпсээтэ, салайааччылары аҕынна, үтүө үлэһиттэри ахтан-санаан ылла, бүтэһиккэ Сергей Зверев айымньытыттан быһа тардан эҕэрдэлээн толордо.
Эҕэрдэлэрин Төхтүр, Бэдьимэ, Сыымах нэһилиэктэрин баһылыктара тиэртилэр. Биһиги краеведпыт, элбэх кинигэҕэ үлэлээбит, сыратын биэрбит Светлана Николаевна Ильина илдьэ кэлбит тырахтарыыстарбытын сыанаҕа таһаартаан дьон-сэргэ ортотугар билиһиннэрдэ, үлэлэрин аҕынна. Салгыы Хорообут бибилэтиэкэтин үлэһитэ Варвара Филиппова Махтал суруктары Хорообут баһылыгын аатыттан Светлана Николаевна Ильинаҕа, Татьяна Ивановна Артемьеваҕа, Александр Владимирович Эверстовка туттартаата.
Салгыы Агафий Герасимович Иванов оччотооҕу үлэни-хамнаһы, үлэлээн ааспыт дьону, ону сэргэ элбэх тыраахтарга үлэлээн ааспыт биһиги аҕабытын Афанасий Кирсанович Филипповы аҕынна уо.д.а.кэпсээтэ. Эбии этэн ааһар буоллахха, биһиги аҕабыт араас саҥа тахсыбыт тыраахтарга үгүстэригэр үлэлээн ааспыт. Билигин тырахтарыыс дьахталлартан Варвара Григорьевна Филиппова соҕотох баар. Салгыы тэрээһиҥҥэ кэлбит дьон санааларын этэн, эҕэрдэ нүөмэрдэрэ тиэртилэр, биһиги нэһилиэктэн Петр Сергучев ырыатын бэлэхтээтэ. Ол кэминээҕи буҕаалтыр Клара Петровна Шарина бэрт сэргэх түгэннэри ахтан-санаан ааста, бары бииргэ үлэлээбит дьонун, Пахом Агафьевичтыын үлэлээбит сылларын кэпсээтэ.
Түмүккэ Татьяна Ивановна Артемьева кинигэ үлэтин хаамыытын, ханнык нэһилиэк бэрт үчүгэйдик үлэлээбитин хайҕабыл тылынан аҕынна. Үлэлээбит дьоҥҥо Махтал суруктары, сэмэй бэлэхтэри туттардылар. Тэрээһини олохтоох бибилэтиэкэ, кулууп үлэһиттэрэ ыыттылар. Ыалдьыттары тэрээһини түмүктүүр сандалынан күндүлээтилэр. Кэлбит дьон саҥа кинигэлэрин тутан, үөрэн тарҕастылар. Биһиги бу тэрээһиҥҥэ барыыны-кэлиини массыынанан босхо хааччыйбыт нэһилиэкпит дьаһалтатыгар, баһылыкка Гаврил Юрьевич Бродниковка уонна оскуолабыт салайааччытыгар Владислав Петрович Ивановка, суоппардарбытыгар Степан Жирковка, Михаил Чугуновка махталбытын тиэрдэбит.
Варвара Филиппова. Хорообут
