Кулун тутар 9 күнүгэр Майаҕа Дьокуускай куораттан “Чөл олохтоох Саха сирэ” эригийиэннээҕи хамсааһын салайааччыта Матвей Лыткин салайааччылаах “Стимул” хотугу хаамыы тэрилтэтэ ыалдьыттаата.
Майаҕа Чөл олох күннэрин чэрчитинэн буолбут бу тэрээһини Майа сэлиэнньэтин дьаһалтата (Владлена Павлова, Виктория Федорова), “Чөл олохтоох улуус” уопсастыбаннай тэрилтэ (Татьяна Артемьева) иилээн-саҕалаан ыыттылар.
Бу хотугу хаамыы күнүгэр Майа, Чүүйэ, Лоомтука, Хара олохтоохторо кыттыыны ыллылар. Сарсыарда 11 ч. Таала күөлгэ баар хаар куоракка хотугу хаамыы күнүн үөрүүлээхтик арыйыыны түсчүт Зиновий Игнатьев алгыһынан саҕалаата. Д.Ф.Ходулов аатынан норуот айымньытын дьиэтин дириэктэрэ Екатерина Ефремова тэрээһини иилээн-саҕалаан ыытта. Майа сэлиэнньэтин баһылыга Алексей Неустроев кэлбит ыалдьыттарга истиҥ эҕэрдэтин тиэртэ. «Чөл олохтоох улуус» сэбиэтин чилиэнэ Степан Копырин ат туһунан ырыата Архип Скрябин хаарынан күөл ньууругар оҥорбут сылгытын үөрүн кытта дьүөрэлэстэ. Матвей Лыткин хотугу хаамыы суолтатын быһааран туран, бу тэрээһин чөл олоххо өссө биир хардыы буоларын чопчулаата. Ыалдьыттартан Валентина Винокурова ыллам ырыатынан эҕэрдэтин анаата. «Көмүс кэм» түмсүү салайааччыта Ариадна Филиппова бүгүҥҥү хаамыы күнүн бырагырааматын билиһиннэрдэ. Үөрүүлээх көрсүһүү хаалыктаах эрчиллиинэн түмүктэннэ.
Таала күөл – Ураһалаах – Комсомольскай болуоссат маршрутунан хаалыктаах хаамыыны Матвей Лыткин, Степан Копырин, Ариадна Филиппова салайан ыыттылар. Түмүккэ Комсомольскай болуоссакка Людмила Неустроева чуор куолаһынан оһуокай этэн, мустубут дьону биир сыалга түмтэ, сомоҕолоото. Күн иккис аҥарыгар “Хотугу хаамыы: билиҥҥи туруга уонна кэлэр кэскилэ” диэн тиэмэҕэ “төгүрүк остуол” ыытыллан, санаа атастаһыыта буолла. Матвей Лыткин хотугу хаамыы суолтатын, устуоруйатын билиһиннэрдэ. Арассыыйаҕа, Москва куоракка ыытыллыбыт күрэхтэһиилэргэ бастаабыт кыргыттар доруобуйаларын туругун тупсаралларын таһынан хайдах дьарыктанан үрдүк ситиһиилэргэ кэлбиттэрин кэпсээтилэр. “Стимул” уопсастыбаннай тэрилтэ тириэньэрэ Владимир Иванов тэрилтэтин үлэтин ис хоһоонун билиһиннэрдэ уонна Майа хаалыктаах хаамааччыларын хаамыы тиэхиньикэтигэр ыҥыран үөрэтиэх буолан эрэннэрдэ. “Көмүс кэм” тэрилтэ салайааччыта Ариадна Филиппова түмсүүтүн үлэтин билиһиннэрэн баран, Майаҕа хаамар киһи элбэх эрээри биир улахан түмсүүгэ тириэньэрдээх дьарыктанар наадатын ыйда. Майа дьаһалтатын исписэлииһэ Виктория Федорова дьаһалтаҕа сүбэлэһэн баран, боппуруоһу быһаарыахпыт диэн эрэннэрдэ. Тыыллыматтан Маргарита Перевалова хаалыктаах хаамааччылар түмсүүлэрэ 30-ча чилиэннээҕин уонна өрөспүүбүлүкэ күрэхтэһиилэригэр ситиһиилээхтик кытталларын кэпсээн үөртэ. Анна Сергучева оскуолаҕа бу көрүҥү киллэрэри туруоруста уонна ыалынан хаамыыга үгэс үөскэтиэн санатта.
Түмүккэ икки өттүттэн сөбүлэһиинэн, мантан саас майалар куоракка үөрэнэ киирэллэрэ быһаарылынна. Алтынньы 1 күнүгэр, Сүүрүү күнүгэр, Мэҥэ Хаҥалас улууһун хотугу хаамыынан дьарыктанааччыларын түмсүүтүгэр «Стимул» уопсастыбаннай тэрилтэ кэлэн үөрэх ыытан, күрэхтэһэн барара былааннанна. Майаҕа ыалынан хаамыы күнүн тэрийэн ыытыы буолуоҕа. Онон ыаллар хаалык булуналлара ирдэнэр.
Бу хотугу хаамыы күнүн тэрийиигэ көмөлөспүттэргэ, чуолаан, Д.Ф.Ходулов аатынан норуот айымньытын дьиэтин дириэктэригэр Екатерина Ефремоваҕа уонна кини кэлэктиибигэр, «Эркээйи» хаһыат үлэһитигэр Иван Лукиҥҥа, асчыт Валентина Мартыноваҕа, сүрүн тэрийээччилэргэ Владлена Павловаҕа, Виктория Федороваҕа о.д.а. махталбытын тиэрдэбит.
Хас биирдии киһи, доруобуйата тупсарын туһугар, бары быраабыланы тутуһан, хаалыктаах хаамыынан дьарыктанар кэмэ кэллэ.
Татьяна Артемьева,
«Чөл олохтоох улуус» уопсастыбаннай тэрилтэ салайааччыта.
